VOV4.Jarai-Hơdor glăi tal 43 thun tơdơi kơ tal blah ngă ƀơi guai dêh čar gah kual Kơdư, mơ̆ng lơ 17/2/1979, tơring glông Mường Khương, tơring čar Lào Cai pơphun jơnum h’ŭ čuh ñang hơdor glăi ƀing tơhan puih kơđông pơgang guai dêh čar Pha Long khin hơtai pơsăn drơi jăn kơ lŏn ia hlăk blah ngă kơtang tit anai pơgang tơlơi dưi guai lŏn ia dêh čar.

Čuh ñang h’ŭ hơdor glăi tơhan pơsăn drơi jăn kơ lŏn ia rơnuk blah ngă ƀơi guai dêh čar

Ƀơi pơnăng čih anăn hơdor ƀing tơhan pơsăn drơi jăn yua kơ lŏn ia dưm gah hnuă Puih kơđông čih anăn 41 čô tơhan pơsăn drơi jăn; amăng anun, 27 čô tơhan rơbuh đih amăng 4 hrơi mlam blah ngă blung a khin hơtai ƀơi tơdron blah guai dêh čar. Ƀrô djơ̆ tal anai, tơring glông Mường Khương ăt pơphun nao čuă hăng tơña bla hơdôm sang anŏ hơmâo djru laih kơ kơnuk kơna, sang anŏ hơmâo mơnuih pơsăn drơi amăng tơring glông; pơphun kih rơmet ngă rogoh anih anom gru phun đưm dêh čar, čuh ñang ƀơi pơnăng čih anăn či pơsat tơhan djai pơsăn drơi jăn kơ lŏn ia rơnuk blah ngă ƀơi guai dêh čar thun 1979.

Nay Jek: Pơblang