Tlam mơmŏt lơ 9/7, ƀơi sang adoh suang ƀôn prong Hồ Chí Minh hơmâo pơphun pơdah Hơdră adoh suang mơak phara biă mă kiăng hơdor glăi kơ Khua hơđăp git gai ping gah, rơgom ơi Lê Duẩn yua kơ Khul adoh suang ling tơhan QK7 ngă hrom sang adoh suang Djuai ania Bông Sen pơphun, ƀrô hơdor glăi tal 37 thun hrơi rơngiă rơgom ơi Lê Duẩn, Khua hơđăp git gai ping gah dêh čar lơ 10/7/1986-lơ 10/7/2023.

Khua mir sir ơi Võ Văn Thưởng nao jơnum hăng ĕp hơdră tơlơi adoh suang anai. Hơdră adoh suang anai pioh kơ ƀing hlăk ai čơđai rơnuk ră anai tơdơi adih hơdor pioh hăng bơni kơ khua ping gah mơnuih rơgơi kơhnâo, hur har, kiăng thâo hluh kơ tơlơi hơdip mơda, bruă mă hơkrŭ đưm, pơklaih rơngai djuai ania ta mơ̆ng rơgom ơi Lê Duẩn, biă mă ñu tơlơi khăp ñu pioh kơ mơnuih ƀôn sang kual dơnung, plơi pla ñu pô pơ tơring čar Quảng Trị laih anun tơlơi khăp ană plơi pla pioh kơ ơi Lê Duẩn. Abih hơdră tơlơi adoh suang anun, hăng boh pơhiăp, mơak pran jua, pơhrôp glăi bruă hơkrŭ đưm mơ̆ng ơi Lê Duẩn lăp pơpŭ hing ang biă mă. Hơdôm thun blan ñu dŏ mă bruă amăng plơi pla truh kơ mông ngă bruă hơkrŭ pơ kual dơnung lơ̆m ngă khua git gai ping gah khul ling tơhan, truh tal kơsung blah djă anăn Hồ Chí Minh hmư̆ hing kiăng pơklaih rơngai lŏn ia lêng kơ hơmâo pơdah pơhrôp glăi mơak biă mă.