Sa amăng ƀing čơđai hơmâo puang lu hloh amăng tal pơplông abih anih 12 thun anai lĕ amon Bùi Thanh Lâm-čơđai sang hră gưl tlâo Chuyên Hùng Vương, dŏ ƀơi phường Diên Hồng, tơring čar Gia Lai. Lâm lĕ sa amăng ƀiă čơđai amăng tơring čar hơmâo puang mrô 10 hăng tơlơi hrăm Angle. Lăi pơthâo kơ tơlơi anai, Lâm hok mơ-ak biă mă hăng ƀu pơmĭn amra dưi ôh. Kơ bruă hrăm prap lui, Lâm lăi pơtong nao kơ tơlơi yôm mơng boh thâo dăp črăn hăng boh pơhiăp lơm ñu hrăm sui thun laih. Sit biă ñu, ñu ăt gơgrong pơlir hơdôm hơdră pơtô hrăm pơplih pơčeh phrâo, anun kiăo tui hrăm măng Youtube tơlơi hrăm Angle pơtô tui boh thâo phrâo kiăng hmư̆ tañ hăng djă pioh lu boh pơhiăp. Lâm brơi thâo:

“Tơlơi pơplông kah pơpha mơnuih hrăm tong ten, yua tơlơi pơplông amuñ ngă amra amuñ biă mă, mơ̆ tơnap amra ngă tơnap tap mơn. Kâo pơmĭn kiăng dưi mă puang mrô 10 ăt yua hrăm mơng anet truh ră anai mơn; hơdôm boh pơhiăp hrăm sui laih; tơdah thâo črăn dăp hăng djă pioh djop mơta amra dưi hơdôm črăn. Kâo juăt kiăo tui lăng amăng Youtube hơmâo lu boh pơhiăp, hmư̆ arăng pơtô amuñ anun lĕ Bsport, ƀudah Mini Earth hăng lu anih pơtô hrăm phara pơkŏn dong”.

Amon Bành Gia Huân, čơđai sang hră Chuyên Lê Quý Đôn (Quy Nhơn) lĕ sa amăng ƀing čơđai hrăm rơgơi hăng 2 tơlơi hrăm puang mrô 10 hăng tơlơi hrăm Angle hăng Vật Lý. Boh than ba glăi anai ƀu djơ̆ kơnong tơlơi pơ-ư ang mơng ƀing čơđai đôč ôh mơ̆ ăt lĕ tơlơi hok mơ-ak hrŏm mơng sang hră hăng sang anŏ. Kiăng dưi mă puang anai, Bành Gia Huân hơmâo gir rin hrăm prap lui hlâo hăng hơmâo hơdră hrăm lăp djơ̆ hloh. Hăng tơlơi hrăm Vật Lý, yua kơ hor kơsem min boh thâo măi mok ngă kơ Huân kiăo tui hrăm tơlơi hrăm anai hăng pran hor mă hajăn. Ñu juăt ngă hơdôm tơlơi pơplông tơnap hloh, pel ĕp dơlăm boh tơhnal hăng tơlơi sit nik kiăng ngă hơdôm tơlơi pơlông lông lăng kiăng thâo kjăp hăng juăt tui hlâo kơ mut pơplông. Hăng tơlơi hrăm Angle, ăt kơtuă mơn yua mă puang lu hloh samơ̆ ñu đăo gơnang amra mă yua lu hloh yua anai lĕ tơlơi hrăm ñu thâo mơn:

“Kâo ăt kơtuă mơng lơm tơlơi Angle ƀing nai pơhrui glăi abih tơlơi pơplông hăng hră pơ-ar yua amăng mông pơplông, yua anun kâo ƀu thâo kâo dưi ngă djơ̆ lu hă ƀŭ. Pơ sang hră kâo hrăm kiăo tui grup hrăm Angle laih dong ăt dong amăng grup nao pơplông hrăm rơgơi dêh čar yua anun hơmâo sang hră pơtô hrăm brơi lu ƀiă. Bơ glăi pơ sang kâo kiăo tui lăng video hrăm tơlơi Angle kiăng mơ-ak đôč hăng dưi hrăm tui lu ƀiă dong”.

Yă Nguyễn Thí Bé, amĭ amon Bành Gia Huân, ƀu hơgŏm tơlơi hok mơ-ak hăng pơ-ư ang biă. Ñu brơi thâo, sang anŏ lêng pơtrut pơsur, ngă gêh gal hloh kiăng Huân đing nao bruă hrăm hră. Hăng tơlơi kjăp pioh kjăp hăng hơmâo jơlan gah tong ten. Huân glăk prap lui mut hrăm sang hră gưl prong hăng gir run kiăo tui tơlơi hrăm tui pran hor mơng ñu.

“Kâo čang rơmang dưi mut hrăm sang hră gưl prong Bách khoa ƀôn prong Hồ Chí Minh, hrăm gah boh thâo măi mok yua anun sang anŏ lêng pơtrut pơsur, hrăm gah tơlơi hrăm anai ăt geh gal mơ̆ glêh glar mơn, anun kiăng gir run kiăng thâo lu ƀiă dong”.

Amăng mrô 327 čô čơđai ƀơi Gia Lai hơmâo puang mrô 10 amăng tal pơplông abih anih 12 thun 2025, lu hloh lĕ hơdôm tơlơi hrăm gah Khoa học xã hội hăng Khoa học tự nhiên. Tơlơi anai brơi ƀuh tơlơi bơkơnar amăng pơtô hrăm hăng tơlơi tŭ mă boh thâo mơng ƀing čơđai amăng tơring čar./.