VOV4.Jarai - Mơguah lơ 7/4, ƀơi Hà Nội, Hră pơhing prăk kak Việt Nam hăng hră pơhing tuh pơ alin hơmâo gum hrŏm pơphun Jơnum “Bơkơtuai hơdră mă yua prăk kak djru Jơlan hơdră hơkrŭ glăi hăng pơđĭ kyar bơwih ƀong huă - mơnuih mơnam”. Ngă tui tơlơi pơtrun mrô 11 thun 2022 mơng Kơnuk kơna kơ Jơlan hơdră hơkrŭ glăi, pơđĭ kyar bơwih ƀong huă - mơnuih mơnam, Ding jum prăk kak hơmâo gir run, ječ ameč kơsem min, pơjing hăng mơ-it nao gưl glông kiăng pơtrun hơdôm hơdră bruă yôm phun, kiăng djru brơi mơnuih ƀon sang, anom bơwih ƀong sĭ mơdrô. Sa, dua hơdră bruă prăk kak, anun lĕ lui hĭ, pơhrŏ trun mă jia, hơmâo mă yua amăng tơlơi hơdip hăng hơmâo lu mơnuih lăng yôm. Hơdôm hơdră djru yôm phăn anai ăt hơmâo pơgôp prong prin kiăng anom bơwih ƀong sĭ mơdrô hăng tơlơi bơwih ƀong huă hơkrŭ glăi amăng rơwang tal 1 thun anai. Amăng jơnum anai, khua mua Anom bruă mă jia hăng anom bruă wai lăng sĭ mơdrô pơ tač rơngiao ăt lăi pơthâo sa, dua hơdră yôm phun djru brơi anom bơwih ƀong sĭ mơdrô pơ anăp anai, sit biă ñu lĕ pơplih amăng bruă ngă hră pơ-ar, mă yua boh thâo phrâo, pơđĭ kyar mă jia hăng mă yua boh thâo măi mok.

Siu Đoan: Pơblang