Gong gai hơdôm boh ƀon lan glăk ječ ameč pok pơhai hơdôm hơdră pơhlôm pơgang, pơhŭi hlâo mơnuih ƀôn sang kơđiăng pơhlôm rơnuk rơnua. Ƀơi Dak Lak, hơjan prong ngă sa, dua kual plơi pla ƀơi să M’Drăk ia dăo. Gong ai hăng hơdôm boh plơi pla pơphun pel ĕp, djru brơi mơnuih ƀôn sang ba đuăi gơnam tam, pơanur hơdôm boh sang anŏ kual hŭi rơhyưt nao dŏ pơ anih kơdư ƀiă. Ƀơi kual Čư̆ Prao, hơjan prong ngă ia dăo ƀơi bơnư̆ găn nao rai.

Kông ang să hơmâo dưm kơƀang pơhŭi hlâo, akă hrĕ pơgăn mơnuih hăng rơdêh đuăi nao rai ƀơi hơdôm kual hŭi rơhyưt. Hơjan prong sui hrơi amra ngă ia prong ƀơi hơdôm ia krông čroh hnoh, ngă lŏn tơhroh hăng ia dăo ƀơi hơdôm kual gah plung. Gong gai hơdôm boh ƀon lan pơhŭi hlâo mơnuih ƀôn sang anăm găn nao tơdrông tua, bơnư̆ găn nao rai, kual ia dăo dơlăm ƀudah hơdôm glông ia rô čơtăng; ngă tui hơdôm anih wai lăng, anăm găn nao hơdôm anih arăng pơgăn pơhŭi.

Jơnum min mơnuih ƀon sang să Canh Vinh, tơring čar Gia Lai kŏm jăng jai mơnuih hăng rơdêh găn nao pơ jơlan čư̆ Nha Sam, tơdơi kơ ƀuh nam pơčah, čơđang ƀơi kơčŏng čư̆ gah akiăng jơlan, yua hơjan prong amăng hơdôm hrơi rơgao. Tơdah hơjan sui hrơi, lŏn pơ anai tơdu, lik rơkuêng giong ia mơtăm, gah kơčŏng čư̆ ƀu hơđong, ngă lŏn, boh pơtâo tơhro trun ƀơi jơlan. Gong gai ngă hră kŏm mơnuih hăng rơdêh nao rai. Kông an să Canh Vinh hrŏm hăng ling tơhan dŏ gak, pơgăn hĭ, pơčrâo brơi jơlan nao rai.

Hrŏm hăng Canh Vinh, ră anai, lu boh tơring amăng Gia Lai amun hơmâo lŏn tơhlŏm hăng ia dăo mơn. Kah hăng ƀơi să Tây Sơn hơmâo 8 anih amuñ ia dăo laih anun 11 ară jơlan amuñ hơmâo ia dăo mơn. Ƀơi phường Quy Nhơn, rơbêh kơ 30 boh sang anŏ pơ čư̆ Núi Một đuăi nao kơđap pơ pơkŏn; să Đề Gi ba pơđuăi 33 boh sang anŏ hăng 111 čô mơnuih ƀơi dua boh plơi Đức Phổ hăng Cát Khánh tơbiă mơ̆ng anih hŭi tơhlŏm gah yŭ tơkai čư̆ Gành./.