Ƀơi kual ter hang ia rơsĭ tơring čar Dak Lăk hơmâo laih hơjan hăng grŏm kơmlă, mơmot kơnôl 8/11. Hăng tơlơi pơhŭi hơjan prong biă mă, mơnuih ƀon sang dŏ gah plung, ter ia krông Pa, ia krông Bàn Thạch hăng Sông Cái hơmâo pơkra giong laih sang glông kơđap kơthel, Sang hlơi hơmâo prăk lĕ ngă sang hơmâo drông hăng ngŏ kjăp ƀiă, sang anŏ hlơi tơnap lĕ ta mă yua kyâo, rơnap, pơkra adrông ngă anih kơđap glông hloh amăng sang. Ơi Nguyễn Chánh Hướng, gah kueng xóm Chùa, plơi Ngọc Phướng, phường Tuy Hòa brơi thâo: “Amăng mông anai abih bang leng kơ pơkra sang hăng ngŏ, pơkra drông hŭi ia dăo, pơmin glăi hlâo adih bral đơi yơh. Sang anŏ hlơi thơ hơmâo kơdung lĕ klum hĭ, bơ pơdai lĕ ta pơdŭ đĭ abih hăng ngŏ mơtăm”.

Tơdơi kơ tal hơjan kơthel, ia dăo thun hlâo, ngă kơ hơdôm rơtuh tơn pơdai răm rai, brŭ abih, thun anai, mơnuih ƀon sang thâo răk pioh pơdai ngă pơjeh, hăng braih huă, añăm ƀong. Pơdai hơmâo dưm amăng kơdung nilông, akă hĭ khŏp, giong anun yong đĭ hăng ngŏ. Rơdêh thut, măi mok tivi, sum ao, abăn khăn ăt hơmâo dưm amăng kơdung nilông mơn, hŭi kơ ia dăo. Pơ anih juăt ia dăo dlăm, juăt kơđông ƀu thâo tơbiă hyu, lu sang anŏ prăp rơmet gơnam tam či yua mơ̆ng 5 truh kơ 7 hrơi. Ơi Trần Tấn Mạnh, ƀơi să Tây Hòa brơi thâo: “Prăk rơmet hlâo mơ̆ng ia mơñum truh kơ mơnong ƀong huă, pioh đĭ hăng ngŏ hŭi pơsah, ta pơhlom hlâo tui anun yơh amăng hrơi hơjan kơthel či truh”.

Bruă prăp rơmet hlâo mơ̆ng rim sang anŏ truh kơ hơdră djru ba mơ̆ng gong gai, tơlơi pơtrun “4 ƀơi anih” ăt jing bruă akŏ phun mơn. Anom bruă pơgang hlâo tơlơi truh tơring čar Dak Lăk kiăng hơdôm boh tơring hơmâo hơdră ngă bruă lăp djơ̆ hăng rim kual, kiăo tui tơlơi truh lŏn adai ngă tơdu hă kơtang. Ơi Đỗ Hữu Huy, Khua jơnum min mơnuih ƀon sang tơring čar Dak Lăk lăi dlăm tơlơi gơgrong bruă mơ̆ng gong gai amăng bruă pơgang tơlơi truh hơjan kơthel, angin rơbŭ: “Kâo rơkâo kiăng ngă bruă 4 ƀơi anih: Črâo bruă ƀơi anih, khul tơhan ƀơi anih, rơdêh măi mok ƀơi anih hăng djŏp mơta mơnong ƀong huă, ia jrao gun hơmâo ƀơi anih mơn, ngă hiưm pă kiăng prăp rơmet brơi djŏp. Khua sang să, phường yơh pô gơgrong abih bang, git gai ƀơi anih. Jao bruă kơ să krăp lăng rim boh plơi pla, ƀon ƀut juăt hơmâo tơlơi truh”.

Hơjan kơthel ia ling dăo jai hrơi ƀu thâo hlâo, jai hrơi kơtang. Bruă prăp rơmet mơ̆ng rim boh să, hrŏm hăng bruă pơgang hlâo mơ̆ng gong gai să, phường, jing plai ƀiă mơn tơnap tap, huăi dŏ kơtuă, huăi sư̆ rơbư̆ ôh, tui anun plai mơn ngă tơnap kơ khul tơhan djru mơnuih bưp tơlơi truh hăng plai mơn răm rai lơ̆m hơjan kơthel truh./.