Tlam mơmŏt tom brơi (10/11), tui tơlơi git gai mơng Khua git gai pơ ala mơnuih ƀôn sang dêh čar ơi Trần Thanh Mẫn, jơnum min apăn bruă Khua pơ ala mơnuih ƀon sang dêh čar tŏ tui pơphun jơnum lok 2, hrơi jơnum tal 8 pơgôp hiăp kơ bruă lăi pơthâo, tŭ mă, pơplih pơkra hăng grup 3 črăn tơlơi phiăn hơmâo tơlơi phiăn juă nua kông ngăn (čih pơkra glăi), tơlơi phiăn čih pơkra, pơhrua sa, dua črăn amăng tơlơi phiăn apui lơtrik, tơlơi phiăn čih pơkra, pơhrua sa, dua črăn amăng tơlơi phiăn tuh pơ alin; bruă pơplih pơkra kual lŏn mơnai kơplah wah ƀôn prong Hà Nội hăng tơring čar Phú Thọ.

Pơgôp hiăp amăng grup 3 črăn tơlơi phiăn anun lĕ tơlơi phiăn juă nua kông ngăn (čih pơkra glăi); tơlơi phiăn čih pơkra, pơhrua sa, dua črăn amăng tơlơi apui lơtrik, tơlơi čih pơkra, pơhrua sa, dua črăn amăng tơlơi phiăn tuh pơ alin, Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong, hơnong pơkă rơnuč lơm Ƀirô Khua pơ ala mơnuih ƀon sang dêh čar tŭ yap mă yua, lăi pơthâo tŭ mă, lăi pơthâo kiăng pơgiong abih. Lăi pơtong, tlâo črăn tơlơi phiăn yôm phăn biă mă, Khua git gai pơ ala mơnuih ƀôn sang dêh čar ơi Trần Thanh Mẫn pơtă pơtăn anăm brơi ngă soh, tơlơi dưi phara pơmut amăng hơdôm tơlơi phiăn anai, anăm yua tơlơi dưi mơng rĭm čô mơnuih, sa khul grup mơ̆ pơplih pơkra, bruă kiăng ngă lĕ yua tơlơi dưi pơđĭ kyar lŏn ia.