Gong gai plơi pla hơmâo dăp brơi anih dŏ, mơnong ƀong huă, ia mơñum djru mơnuih ƀôn sang hăng brơi nao ƀing tơhan pơgang ba kông ngăn dram gơnam ană plơi ƀơi sang anŏ, ƀu brơi pô sang pơwơ̆t glăi pơ plơi pla, anih dŏ jăng jai lơ̆m hơjan hlim, ia lip ngă.

Tui hăng anun, hơdôm anih pơdŭ đuăi mơnuih ƀôn sang lĕ hơmâo: kual čư̆ Một, čư̆ Bà Hỏa, plơi Xóm Đăng, Xóm Đò hăng kual Hải Minh. Kiăng mơnuih ƀôn sang hơđong đuăi mơ̆ng sang anŏ dŏ jăng jai ƀơi anih kơnuk kơna pơphô brơi, gong gai plơi pla djru mơnong ƀong huă, ia mơñum, gơnam yua abăn khăn, hnă hnơi či kiăng ječ. Ƀơi anăp tơlơi pơhing hơjan hlim, ia ling dăo ngă, phường Quy Nhơn lăi pha, tơring čar Gia Lai hnun mơ̆n, ăt djă hnơ̆ng brơi khul tơhan djop sang bruă prăp či mă bruă amăng hrơi hăng mlam, krăp lăng tơlơi pơhing adai hơjan hlim pơblih hiư̆m pă, wai lăng tong ten ƀơi anih hŭi rơhyưt, hŭi hơmâo mơnuih găn rơgao nao rai.