Phun ñu hơmâo tơlơi truh, yua hlim hơjan prong sui hrơi, na nao ngă kơ lŏn ƀơi kơdư čư̆ tơhlŏm trun tơluč ia, dor hĭ đang hmua hăng sang dưm rơdêh mơnuih ƀôn sang. Bưng mơ̆n mông anun huăi djơ̆ răm kơ mơnuih. Khul khua mua git gai bruă pơhlôm pơgang tơlơi truh lŏn adai ngă hăng hơduah ĕp pơklaih mông ječ ameč tơring glông Mdrak hơmâo ƀuh ƀô̆ mơta pơ să, anih hơmâo tơlơi truh, brơi pơdŭ đuăi tañ 4 boh sang anŏ mơnuih ƀôn sang, 15 čô mơnuih nao dŏ pơ anih rơnuk rơnua hloh.

Khul khua mua git gai bruă pơhlôm pơgang tơlơi truh lŏn adai ngă tơring glông Mdrak, Dak Lak nao sem lăng ƀơi anih hơmâo tơlơi truh, pơtrun hiăp kơ să khom pơhlôm pơgang brơi kơ hơdôm sang anŏ đuăi mơ̆ng anih hŭi rơhyưt, pơgang tong ten kông ngăn dram gơnam ană plơi pla laih anun pơkra hơdră  djru pơđuăi hơdôm sang anŏ amăng kual tơdah hơmâo tơlơi truh lŏn tơluč, tơhlŏm trun amăng bơyan hlim hơjan kơthel mrô 6 či truh, kiăng bĕ hĭ tơlơi răm ƀăm kơ mơnuih mơnam.