Amăng hră mơ-it, tơring čar Dak Lăk lăi rơđah: Mơnuih ƀon sang djŏp djuai ania mơng tơring čar hil biă mă kơ bruă ngă soh tơlơi phiăn mơng ƀing kơsung blah anai. Tơhan apăn bruă glăk ječ ameč hyu ĕp, kiăo mă khŏm hơmâo hơdôm čô mơnuih dŏ glăi či bơtơhmal tui hăng tơlơi phiăn. Djŏp gưl ping gah, gong gai hơmâo tơlơi pơtrun ngă hơđong plơi pla, mơnuih ƀon sang, hyu tơña bla, djru ba hơdôm boh sang hơmâo mơnuih djai rơngiă, rơka rơkač; lăi pơthâo, juh alum mơnuih ƀon sang hơđong pran jua, anăm bral ôh, ngă tui tơlơi pơtô ba mơng anom apăn bruă. Ping gah tơring čar - Jơnum min pơ ala mơnuih ƀon sang - Jơnum min mơnuih ƀon sang - Jơnum min djŏp djuai ania mơnuih mơnam Việt Nam tơring čar jăm ƀuah kơtang biă bruă kơsung blah anom bruă kơnuk kơna, pơdjai mơnuih, ngă soh tơlơi phiăn kơtang biă mă mơng grup anai; laih dong rơngôt hrŏm hăng sang anŏ tơhan kông an, khua mua să hăng mơnuih ƀon sang djai yua.

Tơring čar Dak Lăk iâu pơthưr mơnuih ƀon sang, ling tơhan ƀơi tơring čar gum hrŏm ha pran jua, đăo gơnang kơ tơlơi pơtrun mơng Ping gah, tơlơi git gai mơng ping gah tơring čar hăng tơlơi git gai mơng gong gai djŏp gưl. Gir nao hrŏm hăng bruă “Abih bang mơnuih ƀon sang pơgang rơnuk rơnua Lŏn ia”, pơtrut tui anŏ kơtang mơng tơhan mơnuih ƀon sang gum pơgang lŏn ia pơlir hăng pơgang rơnuk rơnua mơnuih ƀon sang kơjăp phik; ngă hrŏm, djru ba ling tơhan ngă bruă; gum djru, rơngôt hrŏm hăng hơdôm boh sang anŏ tơhan djai pơsăn drơi, ƀing khua mua amăng să hăng mơnuih ƀon sang bưp tơlơi truh; hơđong pran jua mă bruă, djru ngă hơđong, pơđĭ kyar mơng plơi pla. Ƀu dưi čih amăng plang internet, pôr pơthâo hơdôm tơlơi pơhing bơdjơ̆ nao tơlơi truh anai lơ̆m aka ƀu thâo sit, hŭi ngă tơnap kơ ling tơhan amăng mông ngă bruă wơ̆t hăng ngă ană plơi bral bơngơ̆t; khŏm kơđiăng, khut khăt “anăm hmư̆, anăm ƀong ia bah, anăm kiăo tui” ƀing hơmâo tơlơi pơmin pơblư̆ lŏn ia, pơčut pơčao pơkơdong glăi gong gai lŏn ia, ngă rung răng ƀơi plơi pla.