VOV4.Jarai-Ƀrô hơdor glăi 132 thun Hrơi tơkeng kơ Khua mir sir Hồ Chí Minh lơ 19/5/1890-lơ 19/5/2022, lơ 19/5, Hră pơhing Điện tử Ping gah Cộng sản Việt Nam pơdah thâo sit nik bơnah phrâo amăng plang tơlơi pơhing điện tử Hồ Chí Minh kiăng pơblih phrâo, pơđĭ tui boh tŭ yua, boh yôm tơlơi pơhing brơi kơ mơnuih ĕp lăng pơđok tơlơi pơhing amăng dêh čar hăng jar kmar. Ơi Nguyễn Trọng Nghĩa, ding kơna khul git gai ping gah dêh čar, Khua anom pơtô bruă Ping gah dêh čar nao jơnum hăng git gai bruă ngă anai.

Pơhiăp đĭ amăng mông jơnum, ơi Nguyễn Trọng Nghĩa rơkâo anom bruă tơlơi pơhing điện tử Đảng Cộng sản Việt Nam ăt čih tơlơi pơhing hmar, pơhrua tui, mrô rơnoh kiăng pơtô lăi, pơdah thâo, djru mơnuih pơđok tơlơi pơhing amăng dêh čar ta hăng lŏn ia tač rơngiao thâo hluh dơlăm hloh hlom bom, tơpă ară, djơ̆ hnong kơ tơlơi hơdip, bruă mă mơ̆ng Khua mir sir Hồ Chí Minh laih anun kông ngăn yôm phara mơ̆ ñu pioh glăi. Laih dơ̆ng,  kah pơpha hơdôm tơlơi bơ ră ruai klă hiam, gru tơpă mă bruă thâo rơgơi, pơčeh phrâo dưi bơngač kơtang, pơtrut pran jua bruă mă pơkơtưn khăp kơ lŏn ia, hrăm hăng hla tui tơlơi pơmin, pran jua, tơlơi dŏ dong ƀong huă Hồ Chí Minh ngă anŏ pơhmu rơđah rơđong.

Nay Jek: Pơblang