Khua git gai pơ ala mơnuih ƀôn sang dêh čar ơi Vương Đình Huệ lăi, găn rơgao 98 thun akŏ pơdong hăng pơđĭ kyar, Hră pơhing hơkrŭ lŏn ia Việt Nam yua Khua mir sir Hồ Chí Minh akŏ pơdong hăng git gai lêng kơ nao hrŏm hăng thun blan blah ngă hơkrŭ lŏn ia, gum pơgôp prong biă mă hăng bruă akŏ pơdong hăng pơgang lŏn ia. Yŭ kơ hla kơ Ping gah, hră pơhing hơkrŭ Việt Nam pơđĭ kyar na nao amăng djŏp mơta bruă, jai hrơi hmư̆ hing, kơdrưh hloh. Djŏp rơnuk mơnuih čih hră pơhing hơmâo pơplih klă tui, pơđĭ kyar hăng hrưn đĭ djơ̆ hăng tơlơi kiăng mơ̆ng djuai ania, mut hrŏm jar kmar ƀu hŭi ôh, hơmâo gru grua hiam kiăo tui tơlơi đĭ kyar mơ̆ng hră pơhing hăng bruă pôr pơhing jar kmar. Abih bang gum pơsit hăng pơpŭ tơlơi kơdrưh kơ-ang, anŏ kơtang hăng hơmâo arăng tŭ yap đăo gơnang kơ Việt Nam

“Kâo bơni hơ-ơč kơ abih bang mơnuih čih hră pơhing amăng dêh čar ta hơmâo gir kơ bruă, hơmâo ngă lu tơlơi truh kih prong. Biă ñu, kâo lăng yôm biă mă tơlơi gum pơgôp mơ̆ng ƀing khua git gai, wai lăng bruă čih tơlơi pơhing hơmâo ngă bruă truh kih, djru brơi bruă čih hră pơhing jai hrơi pơđĭ kyar, pơđĭ tui anŏ klă mơ̆ng hră pơhing hơkrŭ lŏn ia, gum pơgôp prong amăng bruă pơplih phrâo hăng mut hrŏm jar kmar mơ̆ng lŏn ia ta. Kâo pơsit tơlơi gum pơgôp prong mơ̆ng djŏp gưl Khua čih hră pơhing phrâo Việt Nam mơng Gơnong dlông truh pơ tơring čar amăng 73 thun rơgao ƀu pơdơi pơdă pok prong, hruă kơjăp tui tơlơi gum pơgôp abih bang mơnuih čih hră pơhing, pơtô kơjăp bruă hăng pơgang ba tơlơi dưi mơ̆ng djŏp mơnuih amăng khul”.

Ăt amăng hrơi ngă lơphet 98 thun Hrơi hră pơhing hơkrŭ lŏn ia Việt Nam, Khua anom pơtô bruă Ping gah ơi Nguyễn Trọng Nghĩa hơmâo git gai bưp, ngă bruă hăng ngă bruă tom khua mua hơdôm anom bruă čih hră pơhing phun. Khua anom pơtô bruă Ping gah brơi thâo, 12 anom bruă čih tơlơi pơhing kơđi čar hơmâo pok pơhai bruă pơtô pơhrăm brơi ƀing hyu mă tơlơi pơhing phrâo, mơnuih dăp hră pơhing, ƀing khua, mơnuih čih hră pơhing wơ̆t bruă kơđi čar hăng bruă čih tơlơi pơhing, pơplih mă yua mrô hră pơhing, sit nik jing hơdôm anom bruă čih tơlơi pơhing nao hlâo, ba jơlan ngă gru amăng bruă akŏ pơdong anih čih hră pơhing klă hiam...Khua anom pơtô bruă Ping gah ơi Nguyễn Trọng Nghĩa lăi rơđah:

“Hrơi pioh kơ mơnuih čih hră pơhing hơkrŭ thun anai, ƀing ta lăng glăi 2 thun ha mơkrah ngă tui Tơlơi pơtrun Jơnum ping gah dêh čar tal 13 - kơplah wah rơwang bruă hăng lăng nao pơ anăp prăp lui bruă ngă lơphet 100 thun Hrơi hră pơhing hơkrŭ lŏn ia jing klă yơh. Tui anun, hơmâo pơtŏng glăi hơdôm bruă hơmâo ngă yôm phun amăng 2 thun ha mơkrah, kơplah wah rơwang bruă ngă tui Tơlơi pơtrun Jơnum ping gah dêh čar tal 13 amăng bruă pôr tơlơi pơhing, pơƀut amăng hơdôm anom bruă čih tơlơi pơhing phun mơng Ping gah, mơng Kơnuk kơna, djŏp gong gai ƀôn lan”.

Lơ 21/6 jing hrơi jơnum ngui mơ̆ng mơnuih čih hră pơhing hơkrŭ lŏn ia. Ƀơi plơi prong jưh jom Hà Nội, mơmot lơ 21/6 pơphun brơi Pri Hră pơhing Dêh čar tal 17 thun 2022, hăng 124 tơlơi čih pơhing rơgơi hloh mơ̆ng ƀing čih tơlơi pơhing, grup čih tơlơi pơhing hơmâo pơpŭ bơni. Pri tal anai hơmâo rơbêh 1.890 tơlơi pơhing ba pơplông, hơmâo 157 tơlơi pơhing dưi pơplông tal rơnuč, Khul jao pri hơmao ruah mă 124 tơlơi pơhing rơgơi hloh, djơ̆ hloh či brơi pri, hơmâo 9 pri A, 24 pri B, 46 pri C, 45 pri pơtrut pran jua.

Tui hăng tơlơi pơtŏng lăng mơ̆ng Khul brơi pri, hơdôm tơlơi pơhing ba pơplông mă pri hơmâo kiăo tui hơdôm bruă prong mơng kơđi čar, bơwih ƀong, gru grua, mơnuih mơnam, ling tơhan, rơnuk rơnua hăng hơdôm tơlơi pơkŏn dong amăng tơlơi hơdip thun 2022, lăi rơđah hơdôm bruă yôm mơng lŏn ia. Yă Đỗ Thị Thu Hằng, Khua anom apăn bruă Khul Čih hră pơhing Việt Nam, Kơ-iăng khua Khul čŏm blung a Pri hră pơhing dêh čar tal 17 brơi thâo:

“Hơdôm tơlơi pơhing ba pơplông mă pri thun anai klă soh, abih bang tơlơi čih lêng kiăo tui tơlơi hơmâo sit nik, pôr tơlơi pơhing phrâo, lăi nao tơlơi hmư̆ hing hloh amăng thun 2022 amăng bruă kơđi čar, bơwih ƀong, rơnuk rơnua pơgang lŏn ia, akŏ pơdong Ping gah...Lu tơlơi čih hơmâo pioh pran jua, hrơi mă bruă, čih kơ hơdôm tơlơi pơhing phrâo, lăi glăi hơdôm tơlơi pơtrun mơ̆ng Ping gah, Kơnuk kơna; rơkâo đĭ hơdôm hơdră ngă bruă phrâo, bang hyu, bơdjơ̆ nao amăng mơnuih mơnam. Lu tơlơi pơhing klă, hơmâo prăp rơmet tong ten, čih jê̆ giăm amuñ thâo hluh, ngă pơhưč pô pơđok”.

Tơlơi pơplih phrâo mơ̆ng pri tal anai lĕ, rơngiao kơ hơdôm anom bruă pôr pơhing Kơnuk kơna, anom bruă pôr pơhing amăng tơring čar ăt pơƀuh tơlơi pơčeh phrâo, pôr pơthâo hăng lu glông jơlan mơn. Lu khul čih hră pơhing tơring čar hơmâo prăp rơmet ruah mă hơdôm tơlơi pơhing klă hloh ba pơplông. Pri hră pơhing dêh čar tal 17 thun 2022, hră pơhing rup hơmâo lu tơlơi čih klă hloh kơ thun hlâo, biă ñu ƀơi hơdôm anom bruă, tơring čar hơmâo prăp lui klă kơ tơlơi čih ba pơplông, hơmâo rup, tơlơi čih lăi nao djơ̆ akŏ bruă, hơmâo čih rơguăt.