VOV4.Jarai - Tui tơlơi pơkă mơng Ding jum pơtô pơhrăm, mơng hrơi anai (4/5), čơđai sang hră amăng đơ đam dêh čar ta pơphun ngă hră pioh pơplông mă ƀăng gưl 3 thun 2022. Tal pơplông mă ƀăng anai amra pơphun amăng 2 hrơi lơ 7 hăng lơ 8/7/2022. Anai lĕ thun blung a, čơđai anih 12 ngă hră pơplông mă ƀăng gưl 3 tui hơdră lăng nao rai mơng ataih abih bang (djop thun čơđai amra ruah mă pơplông lăng nao rai mơng ataih ƀudah ƀơi sang hră). Kiăo tui anun, čơđai sang hră glăk hrăm anih 12 thun hrăm 2021-2022 ngă hră pơplông tui hơdră lăng nao rai mơng ataih mơng hrơi anai (4/5) truh 5 mông čơtlăm lơ 13/5 ƀơi Glông wai lăng pơplông ƀơi anăn https://thisinh.thitotnghiepthpt.edu.vn. Ƀing čơđai rơkâo pơplông mơng gah rơngiao kơ anih hrăm ăt ngă hră rơkâo pơplông ƀơi anăp hăng hră pơ-ar kah hăng djop thun hlâo adih mơn; anih anom ngă hră rơkâo pơplông yua kơ Gơnong bruă pơtô pơhrăm hơdôm tơring čar, ƀôn prong pơkă. Lom hmâo tơlơi gun, čơđai sang hră khom lăi pơthâo mơtăm hăng nai pơtô dưi jao bruă djru mơng sang hră ƀudah lăi pơthâo hăng anih anom phun djru brơi tui mrô 18008000 glông mrô 2./.

Siu H’ Prăk: Pơblang