VOV4.Jarai - Tơdơi kơ 6 hrơi mă bruă, tlam hrơi anai (10/5), Jơnum lok 5 Khul apăn bruă Ping gah dêh čar tal XIII pơđut ƀơi plơi prong jưh jom Hà Nội. Amăng hơdôm hrơi laih rơgao, Jơnum lok 5 Khul apăn bruă Ping gah tal XIII hơmâo ba nao pơčrông sai, pơgôp hiăp hơdôm bruă yôm phun. Ƀing khua mua bơkơtuai, pơgôp hiăp: lăng glăi 10 thun ngă tui tơlơi pơtrun  mơng Jơnum Ping gah lok 6 tal XI amăng pơplih phrâo hơdră bruă, tơlơi phiăn lŏn mơnai amăng thun blan glăk pơtrut pơplih phrâo amăng djop mơta.

Hrơi mă bruă tal 5 Jơnum lok 5 khul apăn bruă Ping gah dêh čar

Lăng glăi 15 thun ngă tui tơlơi pơtrun jơnum Ping gah lok 7 tal X amăng ngă hmua, mơnuih ngă hmua, ƀon lan. Lăng glăi 20 thun ngă tui tơlơi pơtrun mơng Jơnum Ping gah lok 5 tal IX kiăng tŏ tui pơplih phrâo, pơđĭ kyar hăng hrưn đĭ klă dong amăng bơwih ƀong huă tui khul grup. Akŏ bruă pơjing khul grup Ping gah hăng mơnuih apăn bruă Ping gah. Akŏ bruă akŏ pơjing Khul git gai gưl tơring čar amăng pơgang, pơgăn hưp ƀong kông ngăn, tơlơi ngă soh. Lăi pơthâo, lăng glăi tơlơi git gai mơng Ding jum kơđi čar, Khul apăn bruă Ping gah thun 2021; hăng sa, dua bruă yôm phun.

Siu Đoan: Pơblang