VOV4.Jarai - Hrơi anai (16/2) 51 bôh tơring čar, ƀôn prong pok phun ngă lơphet jao, čơkă ling tơhan amăng đơ đam dêh čar thun 2022 hăng pran jua tañ rơguăt, pơhlôm, ngă tui tơpă tơlơi pơkă pơgang pơgăn klin. Khă bruă ruah hăng iâu mơnuih nao ngă tơhan pơphun amăng hơdôm hrơi klin ngă tơnap hai, samơ̆ hơdôm bôh tơring čar, ƀôn prong amăng đơ đam dêh čar ta hmâo ngă giong laih tơhnal ruah hăng iâu mơnuih nao ngă tơhan thun 2022 hăng anô̆ kơjăp prong, lu hlăk ai dưi ruah nao ngă tơhan hmâo tơlơi suaih pral klă djuai 1, djuai 2. Kiăng pơhlôm klă bruă ruah tơhan, Anom wai lăng bruă ruah ling tơhan (Ƀirô pơphô bruă Khul ling tơhan dêh čar Việt Nam) hmâo ngă klă laih bruă pơphô brơi, ba tơbiă, hơdôm bôh ƀirô, anom bruă, plơi pla thâo kơjăp tơlơi, pok pơhai ha amăng plĕ hơdôm jơlan pơsir, pơplih tañ amăng git gai, pơsit pran jua ƀu pioh klin ruă bơbeč truh bruă ruah ling tơhan. Đing nao ruah ƀing hlăk ai hmâo tơlơi suaih pral klă. Tui kơčăo bruă, bruă jao ling tơhan amra pơphun mơng hrơi anai truh abih lơ 20/2, ngă giong tal jao tơhan amăng thun anai./.

Siu H’ Prăk: Pơblang