VOV4.Jarai - Mơguah hrơi anai ƀơi Hà Nội, pơphun Jơnum hruă kjăp hăng pok pơhai ngă tui tơlơi pơsit mrô 6 mơng Ding jum kơđi čar lơ 24/1/2022 “Kơ akŏ bruă man pơdong wai lăng hăng pơđĭ kyar hơđong plơi prong ƀơi Việt Nam truh thun 2030, anăp nao thun 2045”. Tui hăng sem lăng mơng Anom bruă jŭ yap, bruă pơplih amăng plơi pla ƀơi Việt Nam thun 2010 lĕ 30,39%, truh thun 2020 lĕ 36,8%. Bruă pơplih plơi prong pơphun kơtang ƀơi 2 kual bơwih ƀong huă - mơnuih mơnam akŏ phun lĕ kual lŏn dăo ia krông Hồng hăng kual Ngŏ dơnung, tơdu ƀiă lĕ hơdôm kual čư siăng gah Kơdư. Bruă pơplih hăng pơđĭ kyar amăng plơi prong ngă gêh gal brơi bruă pơđĭ kyar bơwih ƀong huă-mơnuih mơnam, pơtrut pơplih amăng bơwih ƀong huă hăng bruă mă tui hơdră tuh tia pơkra pơjing; bruă pơđĭ kyar ƀơi sa, dua boh plơi prong pơtrut pơđĭ kyar bơwih ƀong huă-mơnuih mơnam ƀơi ƀon lan…Samơ̆, hrŏm hăng boh tha dưi ngă, ăt dŏ lu anŏ aka ƀu klă amăng pơđĭ kyar plơi prong ră anai…Sit biă ñu kiăng hơdôm anom bruă bơdjơ̆ nao pơsir hĭ ha amăng plĕ kiăng pơđĭ kyar plơi prong, kơsem min ba tơbiă hơdôm hơdră phara amăng pơđĭ kyar plơi prong.

Siu Đoan: Pơblang