VOV4.Jarai - Čơtlăm lơ 30/3, ƀơi Hà Nội pơphun mông jơnum tal sa Jơnum Khul bơwih ƀong hlăk ai Việt Nam tal 7, rơwang bruă 2022-2025. Nao pơhmư̆ bruă Jơnum hmâo 800 čô mơnuih hlăk ai bơwih ƀong mơbruă pơ ala brơi rơbêh kơ 11 rơbâo čô mơnuih bơwih ƀong sĭ mơdrô, mơnuih amăng khul đơ đam dêh čar. Jơnum pơsit bruă mă mơng ƀing hlăk ai bơwih ƀong amăng bruă pơđĭ kyar bơwih ƀong khul hăng bruă mă mơng Khul hlăk ai bơwih ƀong Việt Nam rơwang bruă 2018-2021; črông lô jơlan gah bruă mă amăng rơwang bruă 2022-2025 hăng Ruah tơbiă Grŭp mă bruă Khul bơwih ƀong hlăk ai Việt Nam tal 7. Ơi Trần Anh Vương, Kơ-iăng Khua Khul hlăk ai bơwih ƀong Việt Nam brơi thâo: Tơlơi phrâo mơng rơwang bruă pơ̆ anăp lĕ hlăk ai git gai khul; hơdôm bruă mă anăp nao tơhnal hlăk ai hăng pơčeh phrâo, mut hrom jar kơmar; gum hrom hăng hơdôm anih anom pok prong dong khul grŭp pơphun bruă mă pơčeh phrâo. Amăng rơwang jơnum, mơmot lơ 30/3, Khul hlăk ai bơwih ƀong sĭ mơdrô dêh čar Việt Nam pơphun ngă Lơphet apah pri bơni Sao Vàng Đất Việt 2021, pơpŭ Top 10, Top 100 hăng Top 200 – Anăng gơnam hmư̆ hing hloh Việt Nam./.

Siu H’ Prăk: Pơblang