VOV4.Jarai - Mơguah hrơi anai, Khua mua git gai pơ ala mơnuih ƀon sang ăt pơphun dong mơn bruă bơkơtuai ƀơi sang jơnum prong kơ Tơlơi pơtrun ngă lăng hlâo sa, dua hơdră ngă bruă djru pơđĭ kyar tơring čar Khánh Hòa. Pơhmư̆ tơlơi lăi pơthâo, hơduah ĕp kơ bruă brơi prăk arăng čan glăi, pơgang ba Kơnuk kơna jing anom bruă brơi prăk mơng kơnuk kơna; bơkơtuai ƀơi sang jơnum kơ bruă brơi prăk arăng čan glăi, pơgang ba Kơnuk kơna jing anom bruă pơpha hyu prăk kơnuk kơna. Tlam anai, pơphun 2 hrơi ha mơkrah tơña hăng lăi glăi tơlơi tơña. Khua ding jum bruă hmua hăng pơđĭ kyar ƀon lan Lê Minh Hoan gum lăi glăi tơlơi tơña blung a gah bruă hmua. Hlâo kơ anun, amăng lơ 6/6, Khua mua pơ ala mơnuih ƀon sang hơmâo bơkơtuai glăi bruă ngă tui tơlơi pơtrun mrô 66 mơng Khua mua git gai pơ ala mơnuih ƀon sang hăng pok pơhai pơkra jơlan Hồ Chí Minh črăn tŏ tui. Truh mông anai, kơčăo bruă anai hơmâo 2 wơ̆t laih ƀu dưi ngă giong djơ̆ hrơi pơkă, dŏ 171 km aka ƀu hơmâo prăk tuh pơ plai. Lu tơlơi pơgôp hiăp lăi anai lĕ bruă prong mơng kơnuk kơna kiăng hơmâo prăk đah mơng ngă giong mơng kơdư truh pơ dơnung; kiăng Kơnuk kơna brơi prăk kăk đah mơng ngă giong pơkra pơgiong hĭ jơlan dŏ glăi kiăng jơlan Hồ Chí Minh dưi nao rai amăng hrơi blan pơ anăp.

Siu H’Mai: pơblang