VOV4.Jarai - Mơmot lơ 26/3, ƀơi sang adoh prong Hà Nội, Khul hlăk ai rơnuk Hồ Chí Minh dêh čar ta, Keh prăk djru ba hlăk ai rơgơi Việt Nam pơphun ngă lơphet brơi pri Hlăk ai rơgơi mơbruă Việt Nam thun 2021. Anom pơphun bruă hơmâo ruah hăng brơi pri kơ 10 čô hlăk ai rơgơi, hăng 9 čô hlăk ai Việt Nam dưi ngă bruă rơgơi 2021. Anai lĕ ƀing hlăk ai, čơđai anet rơgơi hơmâo lu tơlơi dưi ngă prong amăng bruă hrăm hră, kơsem min boh thâo, bơkơjăp drơi jăn, mă bruă pơkra gơnam, pơgang Lŏn ia. Amăng bruă brơi pri, ƀing hlăk ai Việt Nam rơgơi mơbruă amra dưi pơbưp nao rai, pơhiăp tom ƀing tuai nao lăng amăng 3 mơta bruă “Tơlơi čang rơmang hăng tơlơi kơtưn đĭ”, “Gir găn rơgao tơnap tap” hăng “Hơdôm tơlơi gum djru”. Hăng hơdôm tơlơi ră ruai pơtrut pran jua, hlăk ai Việt Nam ƀu kơnong pơdah rai tơlơi rơgơi, khin hơtai nao hlâo amăng djŏp bruă đôč ôh mơ̆ anai jing tơlơi gir kơtir pơčeh phrâo pơgôp pơđĭ kyar hăng pơsit brơi tơlơi kơtưn jing dêh čar pơdrong asah, kơtang.

Siu H’Mai: Pơblang