VOV4.Jarai - Lơ 25/2, Ƀirô git gai Khul ling tơhan pơgang guai dêh čar tơring čar Daklak gum hrom hăng tơring glông Ea Sup pơphun hrơi jơnum abih bang mơnuih ƀôn sang pơgang guai lŏn ia thun 2022 ƀơi să guai lŏn ia Ia Rvê. Tơring čar Daklak hmâo jơlan guai lŏn ia ataih 73km giăm hăng tơring čar Mondulkiri, dêh čar Kur.

Kual guai lŏn ia tơring čar Daklak hmâo 4 bôh să hăng 51 bôh plơi pla gah 2 tơring glông Buôn Đôn hăng Ea Sup, jing anih dô̆ hơdip mơda mơng rơbêh kơ 22.000 čô mơnuih gah 26 djuai ania. Hơdôm thun rơgao, gưl Ping gah, Gong gai hơdôm anih anom hmâo gum hrom kơjăp hăng Ling tơhan pơgang guai lŏn ia pơgang kơjăp pô lŏn ia, rơnuk rơnua plơi pla, djă kơjăp tơlơi hơđong ƀơi guai dêh čar. Rơđah biă ñu, ƀơi hơdôm bôh să guai lŏn ia hmâo laih 26 grŭp, rơbêh kơ 480 bôh sang anô̆, rơbêh kơ 1.600 čô mơnuih rơkâo gum hrom wai lăng mă pô jơlan guai lŏn ia, pŏng gong guai lŏn ia. Rơngiao kơ anun, mơnuih ƀôn sang ƀơi 51 bôh plơi pla ƀơi guai lŏn ia kĭ pơkôl gum hrom pơgang, pơgăn ƀing ngă soh, tơlơi črih čruai mơnuih mơnam./.

Siu H’ Prăk: Pơblang