Hrơi jơnum mơak anai hăng lu hơdră pơdah thâo lăng hiam mơak biă mă atông čing ring hơgor mơ̆ng 20 grup hăng 300 čô mơnuih adoh suang, pơrơguăt drơi jăn djop tơring glông, plơi prong amăng Lâm Đồng nao pơdah. Anai lĕ mông ngui ngor hiam mơak, hơdor glăi 30 thun hrơi akŏ pơdong tơring glông Bảo Lâm, kiăng djă pioh hăng pơđĭ tui rơnoh yôm gru grua hiam bơngăt jua djop djuai ania amăng tơring čar Lâm Đồng.

Hơdôm thun rơgao, tơring čar Lâm Đồng hơmâo pok rơbêh 100 boh anih pơtô atông čing pơkra ming gông brô̆, brơi kơ 3000 čô tơdăm ngek dra muai čơđai mơnuih djuai ƀiă amăng tơring čar. Laih dơ̆ng, djru brơi čing hơgor kơ 113 grup, djru eng ao kơ 186 grup adoh suang, ƀơk 72 mơta gơnam yua mikrô, pôr adoh suang kơ djop sang rung sang jơnum plơi mơnuih ƀôn sang djuai ƀiă.