VOV4.Jarai - Hrơi anai (19/8) ƀơi Hà Nội, Ding jum ngă hmua hăng pơđĭ kyar ƀon lan gum hrŏm hăng Ding jum pôr pơhing pơphun hrơi “pơplih mă yua boh thâo phrâo amăng ngă hmua hăng pơđĭ kyar ƀon lan” hăng lăi pơthâo pok pơhai plang pôr pơhing hăng anih djă pioh hră pơ-ar, wai lăng mrô kual pla pơjing. Tui jŭ yap, đơ đam dêh čar hơmâo laih 4 klăk 800 rơbâo ektar đang hmua hơmâo: phun kyâo boh troh, hmua pơdai hăng phun kyâo sui thun. Amăng anun, lu kual hơmâo mrô pơsit tong anih pla pơjing kiăng kơ wai lăng anih ngă đang hmua, thâo tong ten anih pla gơnam, hrưn đĭ klă dong gơnam đang hmua anun lĕ: braih pơdai ƀơi kual lŏn dăo Cửu Long; kơphê, boh kruăi hrĕ ƀơi kual Dap kơdư; thanh long ƀơi Bình Thuận; boh ƀrô ƀơi hơdôm tơring čar Hải Dương, Bắc Giang, Hưng Yên, Sơn La… Samơ̆, lăng glăi tong ten, bruă bơwih ƀong ngă hmua ăt dŏ raih daih, anet hăng aka ƀu pơlir hơbit kơpla wah anih pla hăng anih sĭ mơdrô… Tui tơlơi sit nik anai kiăng pơtrut tañ amăng bruă pơplih mă yua boh thâo phrâo amăng ngă hmua kiăng kơ hrưn đĭ tŭ yua amăng pla pơjing, sĭ mơdrô hăng mơnuih blơi gơnam.

Siu Đoan: Pơblang