VOV4.Jarai-Lơ 16/1 pơ anăp, ƀơi sang hră gưl prong hrăm bruă tơhan pơlih mơnuih ƀôn sang, Hơdră hrơi tơjuh mriah tal 14 amra pơphun sit nik. Hơdră anun thun anai, hơmâo lu mơnuih đing nao, djop anom bruă, ding jum, biă mă ñu hơmâo 40 boh tơring čar, ƀôn prong, amra tŭ mă mơ̆ng 45 rơbâo truh 50 rơbâo anung drah arăng pơyơr.

Jơnum lăi pơthâo hơdră Hrơi tơjuh mriah thun 2022

Mah aka ƀu pok pơhai sit nik ôh, dơ̆ng mơ̆ng blan 11 thun hlâo truh ră anai, djop anih jur mă drah amăng Hrơi tơjuh mriah pơphun ƀơi 15 boh tơring čar, ƀôn prong hơmâo tŭ mă 6000 anung drah, dưi djop jăng jai kơ bruă pơjrao tơlơi ruă kraih, ječ ameč hlâo amăng mông hăng tơdơi kơ ƀong tết ngă yang thun phrâo djuai ania taặing Tết Nhâm Dần 2022. Hră pơtrun anăn pơyơr drah pơjrao mơnuih tơlơi hơdip mơ̆ng gơyut hăng kâo, ngă na nao amăng hơpluh thun hăng anai laih, dơ̆ng mơ̆ng pok hrơi pơ anăn Hrơi tơjuh mriah yua kơ Hră pơhing Tiền Phong pô pơphun hlâo, pơtrut pran jua lu mơnuih sit truh bơyan čơkă thun phrâo djuai ania pơtum lu anom bruă, sang bruă hăng mơnuih ƀôn sang djop hnơr, djop plơi pla, tơring tơrang, djuai ania, anom bruă ngă hrom nao pơyơr drah.

Nay Jek: Pơblang