VOV4.Jarai - Giăm hmâo 900 čô mơnuih hlăk ai mơbruă ƀơi 5 bôh tơring čar kual Dăp Kơdư hmâo nao ngă tơhan, ngă bruă pơgang lŏn ia. Khă pơphun amăng tơlơi klin Covid-19 ngă ăt dô̆ kơtang mơn, samơ̆ mông ngă lơphet jao čơkă ling tơhan thun anai hmâo pơphun pơhôm klă mơn, sit nik jing hrơi jơnum ling tơhan phrâo mơng hlăk ai.

Amăng tal jao čơkă ling tơhan thun anai, đơ đam tơring čar Daklak hmâo 2.500 čô mơnuih hlăk ai nao ngă tơhan, 427 čô hlăk ai nao ngă kông ang. Ƀing hlăk ai Daklak nao ngă tơhan tal anai leng kơ pơhlôm djơ̆ tơhnal pơkă kơ bruă kơđi čar, thun pơkă, tơlơi suaih pral, bôh thâo hră. Rơđah biă ñu, rơbêh kơ 70 čô mơnuih hrăm giong đại học – cao đẳng; 8 čô mơnuih ping gah; hlăk ai djuai ania ƀiă hmâo ha mơkrah. Amăng hrơi nao ngă tơhan, ling tơhan Y Săm Mlô, ƀơi phường Ea Tam, plơi prong Buôn Ma Thuột, lăi pơdah.

“Nao ngă tơhan lĕ bruă gơgrong yôm phăn mơng hlăk ai. Yua anun kâo hmâo čih hră rơkâo nao ngă tơhan. Kâo amra gir run hrăm tui, pơhrăm drơi pô ngă giong klă bruă jao”.

Khua pơ ala Ding jum kông ang, Ping gah tơring čar Daklak hrom hăng sa dua grŭp, gơnong bruă pơsur pran jua ƀing hlăk ai ƀơi Daklak nao ngă tơhan

Tơring čar Lâm Đồng thun anai hmâo 1.150 čô mơnuih hlăk ai nao ngă tơhan. Anai lĕ hơdôm hlăk ai mơbruă dưi ruah mơng 12 bôh tơring glông, plơi prong amăng tơring čar. Mông ngă lơphet jao čơkă ling tơhan hmâo pơphun yôm phăn ƀơi hơdôm anih anom, pơhlôm klă hăng tŭ yua.

Amăng tal jao čơkă ling tơhan thun 2022, tơring čar Daklak hmâo 2.500 čô mơnuih hlăk ai nao ngă ling tơhan, 427 čô mơnuih hlăk ai nao ngă kông ang

Thun anai, tơring čar Daknông hmâo rơbêh kơ 1000 čô mơnuih nao ngă tơhan; amăng anun giăm truh 900 čô mơnuih nao ngă ling tơhan, rơbêh kơ 100 čô mơnuih nao ngă kông ang mơnuih ƀôn sang. Amăng mrô mơnuih hlăk ai mơng tơring čar nao ngă tơhan pơgang lŏn ia tal anai abih bang leng kơ mơnuih amăng khul hlăk ai, hmâo 11 čô mơnuih hrăm giong cao đẳng, đại học; hăng hmâo rơbêh ha mơkrah lĕ hlăk ai djuai ania ƀiă.

Hrơi jơnum ngui ling tơhan phrâo ƀơi plơi prong Kontum

2656 čô mơnuih hlăk ai mơng tơring čar Gialai ăt nao ngă ling tơhan pơgang lŏn ia mơn. Amăng mrô hơdôm mơnuih ƀơi Gialai nao ngă ling tơhan tal anai hmâo bôh thâo hrăm hră cao đẳng, đại học rơbêh kơ 1,4%, hmâo 22 čô mơnuih lĕ ping gah; hăng rơbêh kơ 60% lĕ mơnuih djuai ania ƀiă. Lăi pơthâo hlâo kơ nao ngă ling tơhan, ling tơhan Nguyễn Bá Kiên, ƀơi phường Thắng Lợi, plơi prong Pleiku brơi thâo:

“Kâo mơ-ak hăng ư-ang biă lom pô dưi tô̆ tui yak tơkai ƀing adơi ayong nao hlâo nao ngă tơhan pơgang lŏn ia. Kâo ư-ang lom dưi dŏng amăng khul ling tơhan Wa Hồ kiăng ngă tui phiăn juăt hơkrŭ mơng sang anô̆ hăng abih bang djuai ania, ngă bơngač kơ tơlơi đăo kơnang, pran ư-ang amăng drơi pô. Hrom hăng anun ăt ƀuh pơhư̆č pran jua, hling hlang mơn lom giăm nao pơ̆ sa anih anom hăng hơdip amăng tơlơi hơdip phrâo, kâo amra gir run pơhrăm pô hăng tañ ngă juăt hăng anih anom phrâo kiăng lăp djơ̆ hăng tơlơi pơtă pơtăn črâo ba mơng ƀing khua mua git gai amăng plơi prong hăng hơdôm tơlơi pơtô ba mơng amĭ ama kâo”.

Ngă lơphet jao čơkă ling tơhan pơhlôm klă pơgang pơgăn klin Covid-19 ƀơi Gialai

Ƀơi tơring čar Kontum, bruă jao čơkă ling tơhan ăt ngă tui tơpă mơn, tañ rơguăt amăng mơguah lơ 16/2 mơtăm. Thun anai tơring čar hmâo 800 čô mơnuih nao ngă ling tơhan, amăng anun hmâo 8 čô mơnuih lĕ mă bruă čar; sa čô mơnuih ping gah. Ling tơhan phrâo Phạm Hoàng Quốc, ƀơi phường Quyết Thắng, plơi prong Kontum, hmâo bơnai laih hăng hmâo sa čô ană anet, drơi pô ñu glăk mă bruă brơi kơ Sang bruă tơlơi phiăn pơ̆ ƀôn prong Hồ Chí Minh, nao ngă tơhan tal anai brơi thâo:

“Hrơi anai amăng hrơi nao ngă tơhan kâo mơ-ak biă hăng ăt kah hăng hơdôm mơnuih pơkon hăng bruă gơgrong mơng sa čô mơnuih lĕ kâo ư-ang biă hăng tơlơi anun. Puih kơđông mơ̆ kâo nao kiăng ngă tơhan mơng sa čô mơnuih lĕ Trung đoàn 990 hăng tơhnal pơkă mơng kâo lĕ ngă giong prong bruă jao. Khă tơnap tap, khă tơnap hiưm hơpă hai, kâo amra gir run đut hlah pô dưi mơn”.

Dik dak ngă lơphet ling tơhan phrâo ƀơi Daknông

Ngă tui bruă pơgang pơgăn klin Covid-19, abih bang mơnuih nao ngă tơhan mơng 5 bôh tơring čar Dăp Kơdư leng kơ dưi tlâ̆o vaccine ară tal 2 hăng ară tal 3; hlâo kơ hrơi nao ngă tơhan dưi pơčrang lăng kơman SARS-CoV-2 pơhlôm abih bang mut amăng puih kơđông khul ling tơhan pơhlôm, ƀu ƀă kơman Covid-19. Hơdôm tơring čar hmâo ană bă nao ngă tơhan ngă klă bruă gum hơgôp kiăng hrơi jao čơkă ling tơhan thun anai jing hrơi jơnum ngui ling tơhan phrâo, pơjing rai tơlơi mơ-ak hur har, hlăk ai hur har pran jua nao ngă tơhan pơgang Lŏn ia./.

            VOV Tây Nguyên: čih – Siu H’ Prăk: Pơblang