VOV4.Jarai - Tlam lơ 22/3, Grup bơwih ƀong Sovico pơphun jao glăi Glông pôr pơhing điện tử gum djru amăng internet kơ Anom bruă wai lăng Keh vaccine pơgang Covid-19 đah mơng ngă bruă pơtô pơblang, pôr pơhing, jak iâu gum djru keh prăk. Tơdơi giăm 1 thun pơphun ngă, hluai tui glông website: www.quyvacxincovid19.gov.vn hơdôm bruă djru prăk hơmâo lăi pơthâo rơđah amăng hơdôm tal iâu pơthưr gum pơgôp, mơng bruă iâu pơthưr, gum djru truh kơ mă yua prăk, gum bang hyu hăng iâu pơthưr abih bang gum djru prăk kăk, mơng hơdôm anom bruă, hơjăn pô gum pơgôp kơ Keh vaccine pơgang Covid-19. Yap truh 5 mông tlam lơ 21/3/2022, prăk pơhrui hơmâo pơmut amăng mrô Keh prăk (prăk VNĐ hăng prăk čar rơngiao) hơmâo 8.950 klai prăk.

Siu H’Mai: Pơblang