VOV4.Jarai - Ƀơi plơi prong Buôn Ma Thuột, Dak Lak, Khul pơphun pơplông kơphê jơman Việt Nam 2022 hơmâo jao pri asar kơphê jơman Việt Nam brơi hơdôm anom bruă pơkra pơjing kơphê arăng čom puang 80 tui hăng puang pơplông asar kơphê yôm amăng jar kmar. Hăng hơdôm asar kơphê Robusta, dong tal 1 lĕ gah anom bơwih ƀong hrŏm să Ea Tân (Dak Lak), dong tal 2 lĕ kông ti TNHH sa ding kơna Minudo Farm - Care (Dak Lak) dong tal 3 lĕ Đang pla kơphê pơhrui tơsă Ea Tân (Dak Lak).

Hăng hơdôm asar kơphê Arabica, dong tal 1 lĕ kông ti TNHH sa ding kơna Minudo Farm - Care (Dak Lak), dong tal 2 lĕ kông ti pơčuh ngăn sĭ mơdrô tuh pơ alin Dathaco (Hồ Chí Minh), dong tal 3 lĕ kông ti TNHH Pun Coffee (Quảng Trị). Anai lĕ tal 4 pơphun pơplông Kơphê jơman Việt Nam. Tal pơplông anai kiăng pơpŭ mơnuih pla kơphê, asar kơphê hiam hơdjă hăng hơdôm anom bruă kơphê tui hơnong pơkă kơphê jơman; lăi pơthâo kơphê Việt Nam tơl mơnuih ƀon sang, hơmâo sang măi uă tơpung amăng lŏn ia hăng tač rơngiao.

Siu Đoan: Pơblang