Amôn Siu Thúy hrăm anih 6A, sang hră gưl sa hăng gưl dua Čư̆ Đang Rơya, să Biển Hồ, tơring čar Gia Lai, jing să Chư Đang Ya tơring glông Čư̆ Pah hơđăp phrâo ngă giong laih tal pơplông guang hrăm tal 1, juăt lăi học kỳ 1 thun hrăm anai. Amôn Thúy lăi, 5 thun na nao mơtam ñu hrăm gưl sa, hơmâo apah bơni hrăm thâo soh, anun huăi tơnap ôh tal pơplông guam hrăm tal 1 anai. Hrŏm anun dơ̆ng, hrăm amăng sang hră dŏ glăi tơhrơi, huă ƀong amăng sang hră, hơmâo ƀing nai pơtô lăi, djru ba tong ten, anun yơh ñu hơđong pran jua hloh, gir hrăm klă hloh.

“Ƀing nai pơtô amăng sang hră hur har biă mă hăng đing ba djru ƀing gơmơi. Gơmơi amra gir run hloh hrăm thâo, kiăng huăi ngă kơ amĭ ama, ƀing nai pơtô ba bơngơ̆t yua”.

Hrŏm hăng bruă kơnuk kơna djru man pơdong, pơhiam glăi abih bang sang hră, anih hrăm, boh tŭ yua bruă pơtô pơjuăt amăng kual ataih, plơi pla mơnuih djuai ƀiă ƀơi tơring čar Gia Lai, boh tơhnal hrăm ƀuh đĭ tui rơđah laih. Amôn Rmah H’Ý, hrăm anih 5B, Sang hră gưl sa hăng gưl dua Čư̆ Đang Rơya brơi thâo, hơmâo ƀing nai đing nao, lăng ba ten biă mă, lơ̆m dŏ hrăm hră, ƀong huă, ngui ngor ƀing nai pơtô ba jĕ giăm hơ̆k mơak biă mă. Ƀing nai pơtô ƀu kơnong amuñ thâo hluh đôc ôh, djru ba rim čô ƀing čơđai hlơi aka ƀu thâo tơlơi hrăm, sem lăng, tơña bla sang anŏ rim čô čơđai sang hră laih anun pơtrut pran jua juh alum, kiăng hơmâo hơdră djru ba tañ, hmao kru. Mơ̆ng anun, djru lu čơđai sang hră triăng hrăm hră thâo.

“Ƀing nai djru ba tong ten biă mă kơ ƀing gơmơi, lăng ba, djru brơi abih bang. Lơ̆m ƀing gơmơi bưp tơlơi tơnap tap kơƀah lĕ ƀing nai djru mơtam. Yua kơ anun, boh tơhnal hrăm hră mơ̆ng ƀing gơmơi thâo thăi ƀiă. Kâo kiăng kơñ pơgi  truh prong nao ngă tơhan kông an”.

Tui hăng Rmah H’Ngat, dŏ ƀơi plơi Suă, să Biển Hồ, tơring čar Gia Lai, boh tŭ yua amăng bruă pơtô hrăm ƀu kơnong pơđĭ tui ƀuh sang hră phrâo, anih hrăm hiam đôč ôh, hơmâo tơlơi djru ba mơ̆ng ƀing nai khăp kơ bruă, thâo djru ba kơ čơđai sang hră ƀun rin tơnap tap. Boh tŭ yua amăng bruă pơtô hrăm mơ̆ng tơlơi đing nao djru ba prong hloh lĕ Ping gah hăng kơnuk kơna, anun ană amôn, čơđai sang hră djuai ƀiă plai ƀiă tơnap tap, huăi pơčruh prăk apah hrăm hră, kơnuk kơna dŏ djru braih huăi, anih dŏ hăng prăk blơi gơnam yua hrăm hră….Jơlan hơdră tơlơi djru anai, ngă djhôl ƀiă kơ sang anŏ ƀun rin hơmâo ană bă hrăm hră, gêh găl hloh hrăm hră thâo. Rmah H’Ngat brơi thâo:

(Jarai): “Bơni Ping gah, kơnuk kơna hơmâo djru tơlơi hrăm hră kơ ană bă gơmơi, biă mă ñu bơni kơ ƀing nai neh pơtô ba ană amôn gir run hrăm hră, kiăng thâo hră kơñ pơgi, laih anun hrăm thâo hloh. Gơmơi mơak biă mă bơni kơnuk kơna, djru kơ ană plơi pla, ană aneh hrăm hră hơđong”.

Ơi Nguyễn Chiến Thắng, Khua sang hră gưl sa hăng gưl dua Čư̆ Đang Rơya brơi thâo, sang hră hwmâo 90% mrô čơđai sang hră lêng kơ mơnuih djuai ƀiă, lu biă mă ñu Jarai. Jơlan hơdră kơnuk kơna djru wơ̆t čơđai sang hră hăng ƀing nai pơtô amăng kual ataih kual 3, djru kiăng pơđĭ tui rơnoh hiam, tơlơi pơtô hrăm mơ̆ng sang hră anai, anun dưi đĭ tui:
“Yua hơmâo tơlơi djru ba lu hơdră, mơ̆ng Ping gah, kơnuk kơna tui anun, tơlơi thâo ƀuh hluh ten mơ̆ng amĭ ama čơđai sang hră truh kơ ƀing čơđai hai, mrô čơđai hrăm hră thun tơdơi lu hloh kơ thun hlâo. Mơnuih ƀôn sang hơđong pran jua mơ-it ană bă hrăm hră, dŏ glăi ƀong huă amăng sang hră tơhrơi, amĭ ama čơđai sang hră đing nao kơ ană bă, ƀing nai pơtô ăt sem lăng na nao rim tơlơi gêh găl sang anŏ, đah mơ̆ng hơmâo hơdră pơtrut tơlơi thâo thăi kơ mơnuih ƀôn sang, amra tŭ yua klă kơ tơlơi hơdip mơda, bruă mă rim hrơi”.

Tui hăng ơi Nguyễn Đăng Quang, Khua Jơnum min mơnuih ƀôn sang să Gao, anih hơmâo ha mơkrah mrô čơđai sang hră djuai ƀiă, tŭ yua mơ̆ng tơlơi djru ba pơtô hrăm ƀơi kual djuai ania ƀiă lu thun laih rơgao, hơmâo pơđĭ tui tơlơi thâo thăi kơ mơnuih ƀôn sang. Mơ̆ng anun, bruă ba yua boh thâo ia rơgơi phrâo amăng bruă ngă hmua jai hrơi lu, tơlơi hơdip mơda mơnuih ƀôn sang pơblih phrâo ƀuh rơđah. Biă mă ñu, mrô čơđai sang hră djuai ƀiă dưi hrăm truh gưl prong đại học, cao đẳng ƀudah nao hrăm gưl ƀrô hrăm bruă mă jai lu mơ̆n. Mơ̆ng anun, pơđĭ tui mrô mơnuih mă bruă hơmâo tơlơi thâo, hră, giong bruă mă lu, bơwih brơi kơ bruă pơđĭ kyar bơwih ƀong huă mơnuih mơnam amăng tơring čar.

“Tơlơi đing nao kơ bruă pơtô hrăm mơ̆ng ping gah, kơnuk kơna lăp biă mă, boh nik ñu amăng kual ataih, asuek. Tơlơi thâo thăi ƀrư̆ hrơi lu tui, ƀing ană amôn hrăm truh gưl prong lu laih. Gah gong gai kơnuk kơna, gơmơi akŏ pơjing bruă mă, pơhrăm khul mơnuih apăn bruă jing mơnuih djuai ƀiă, tŭ jum ƀing ană amôn hrăm giong gưl prong glăi pioh pơhrăm apăn bruă ngă khua amăng plơi pla, amăng să”.

Lu jơlan hơdră kơnuk kơna djru lăp biă mă ngă pơblih kơtang amăng bruă pơtô hrăm mơnuih djuai ƀiă ƀơi tơring čar Gia Lai lăi pha,  amăng dêh čar ta hnun mơ̆n. Ƀing čơđai sang hră gêh găl dưi nao hrăm hră, nai pơtô ăt tong ten hăng bruă mă, jĕ giăm hloh hăng anih pơtô, hur har huăi pơtah pơtai ngă bruă yua kơ prăk blan, tơlơi djru jai hrơi djop ƀiă, kiăng hơđong tơlơi hơdip mơda. Yua kơ anun, boh tŭ yua pơtô hăng hrăm hră đĭ tui lu ƀuh rơđah mơtam, tơlơi thâo thăi mơ̆ng mơnuih ƀôn sang pơblih đĭ na nao rim thun. Anai jing atur yom biă mă kiăng pơtô hrăm mơnuih mă bruă, apăn bruă ngă khua amăng plơi pla tơdơi anai, pơtrut pơđĭ kyar tơlơi bơwih ƀong huă hơđong kơ kual ataih, kual asuek, plơi pla mơnuih djuai ƀiă.