VOV4.Jarai - Mơguah lơ 21/7, Jơnum đơ đam dêh čar kơsem min, hrăm tui, pơthâo rơđah Tơlơi pơsit Jơnum lok 5 Khul khua apăn bruă git gai Ping gah tal 13 hơmâo pơphun ƀơi sang bruă Khua git gai pơ ala mơnuih ƀon sang dêh čar hăng pơtruh nao rai lăng amăng tivi hăng 63 boh tơring čar, ƀon prong. Ƀơi mông jơnum, Khua dêh čar ơi Phạm Minh Chính hơmâo lăi glăi akŏ bruă “Pơplih phrâo dong, ngă pơgiong tơlơi phiăn, hơdră djru, pơđĭ t ui anŏ tŭ yua wai lăng hăng mă yua lŏn tơnah, pơjing rai gêh gal ba lŏn ia jing dêh čar pơđĭ kyar hơmâo prăk pơhrui lu” ƀơi Tơlơi pơsit mrô 18 NQ/TW, lơ 16/6/2022 đah mơng lăi pơthâo rơđah rơđông, djơ̆ hrŏm amăng tơlơi pơmin, bruă mă amăng abih bang Ping gah, mơnuih ƀon sang, ling tơhan či ngă tui klă hloh Tơlơi pơsit anai.

Mông jơnum.

Khua dêh čar ta črâo rơđah 4 mơta tơlơi amăng Tơlơi pơsit 18 hăng 4 tơlơi anun lĕ, tal sa, hơdôm tơlơi ngă atur čih pơkra giong tơlơi phiăn lŏn tơnah; tal 2, anŏ ječ ameč khŏm kiăng pơplih, ngă giong hĭ tơlơi phiăn, tơlơi djru, pơđĭ tui anŏ tŭ yua wai lăng hăng mă yua lŏn; tal 3 lĕ tơlơi pơmin, tơlơi gơñăm nao; tal 4, bruă mă, hơdră pơsir; tal 5 pơphun ngă.

Siu H’Mai: Pơblang