VOV4.Jarai - Kiăng gum ngă rơđah hloh hơdôm anŏ yôm boh thâo - tơlơi hơmâo sit nik mơng tơlơi pơmin Hồ Chí Minh kơ pơđĭ tui tơlơi pơmin hiam ngă hơkrŭ, kah đuăi abih tơlơi pơmin kiăng klă mă hơjăn, hơ-ơč hrơi ngă lơphet 132 thun hrơi tơkeng Khua mir sir Hồ Chí Minh, mơguah lơ 12/5 ƀơi Hà Nội pơphun Jơnum boh thâo ia rơgơi dêh čar, pơdă prưng rup, hơdrôm hră “pơđĭ tui tơlơi pơmin hiam ngă hơkrŭ, kah đuăi abih tơlơi pơmin kiăng klă mă hơjăn tui tơlơi pơmin, kơnuih Hồ Chí Minh”.

Ơi Võ Văn Thưởng, Ding kơna ding jum kơđi čar, Khua apăn bruă git gai Ping gah nao pơhmư̆ hăng git gai mông Jơnum. Hơdôm tơlơi hơmâo ba bơkơtuai ƀơi mông jơnum hơmâo ngă rơđah anŏ yôm mơng tơlơi pơmin Hồ Chí Minh amăng hơdrôm hră tơlơi pơmin mơng Ñu kơ hơdôm bruă mơng atur mơng tơlơi hơkrŭ Việt Nam; tơlơi gơgrong bruă, tơlơi pơmin črâo brơi jơlan mơng tơlơi pơmin, pran jua Hồ Chí Minh hăng bruă akŏ pơdong Ping gah lăi hrŏm hăng bruă akŏ pơdong  Ping gah kơ tơlơi pơmin pran jua lăi hơjăn mơng hlâo truh ră anai hăng kơ rơnuk phrâo.

Siu H’Mai: Pơblang