VOV4.Jarai - Ƀrô tal hơdor glăi 50 thun hrơi blah dưi Đăk Tô - Tân Cảnh, mơguah lơ 22/4, Ding jum ling tơhan gum hrŏm hăng Ping gah tơring čar Kon Tum pơphun jơnum bơkơtuai boh thâo gưl Ding jum ling tơhan hăng anăn : “Blah dưi Đăk Tô - Tân Cảnh - Tơlơi yôm mơng đưm hlâo hăng pơhrăm tui tơlơi găn rơgao”. Hăng rơbêh 80 hră lăi pơthâo, pơgôp hiăp hơmâo ngă rơđah hơdôm tơlơi pơčut pơčao ngă sat mơng ayăt Mi hăng gong gai Sài Gòn, kơdrưh hăng pran kơtang mơng ling tơhan kual dơnung hăng hơnong pơkă pơphun blah ngă kiăng kơ pơkiăo đuăi ayăt ba glăi tơlơi dưi amăng tal blah wang “Việt Nam pok blah ngă”.

Mông jơnum

Jơnum bơkơtuai hơmâo pơgôp ngă rơđah, dơlăm tui hơdôm bruă mă hăng tơlơi sit nik mơng tal blah dưi Đăk Tô - Tân Cảnh. Anai lĕ boh thâo kiăng kơ ngă tui amăng tơlơi sit nik amăng bruă ling tơhan, wai pơgang rơnuk rơnua, pơgôp ngă klă amăng bruă pơjing hăng wai pơgang lŏn ia ta amăng rơnuk phrâo. Laih dong pơtô pơblang gru grua blah wang, pơsur pran khăp kơ lŏn ia, pơ-ư pơ-ang kơ djuai ania kơ ƀing apăn bruă, ling tơhan hăng abih bang mơnuih ƀon sang.

Siu Đoan: Pơblang