VOV4.Jarai-Mơguah lơ 7/6, ƀơi plơi prong Ƀuôn Ma Thuôt, Khul tơhan hơđăp Việt Nam jơnum bơkơtuai bruă tơhan hơđăp ngă hrom pơgang ayuh hyiăng, hơmâo lu khua mua, tơhan hơđăp mơ̆ng 14 boh tơring čar, ƀôn prong amăng kual Tong krah-Dap Kơdư. Tui hăng Khul tơhan hơđăp Việt Nam, mơ̆ng thun 2006, Khul ngă hrom Ding jum kông ngăn ayuh hyiăng hơmâo kĭ hơdră ngă hrom pơgang ayuh hyiăng hăng wai lăng bruă mă yua lŏn tơnah.

Mông jơnum pơtum abih bang

Truh ră anai, djop gưl khul tơhan hơđăp dưi akŏ pơjing 1.650 grup ngă hrom tơhan hơđăp djru pơgang ayuh hyiăng, anih dŏ jum dar. Hơdôm khul grup ngă hrom anun ngă rah bruă pơgang ayuh hyiăng anih dŏ jum dar, ngă tui lu hơdră pơgang ayuh hyiăng, jak iâu, pơtô lăi amăng bruă anai. Lu grup hyu pơtô pơblang ayuh hyiăng pơgang anih dŏ jum dar gưl să, dưi hơmâo Khul tơhan hơđăp akŏ pơjing hăng mă bruă tŭ yua biă mă.

Ƀơi mông jơnum bơkơtuai lu khua mua pơčrông sai, kah pơpha tơlơi thâo, boh yôm phun amăng bruă mă pơgang ayuh hyiăng, anih dŏ, tơlơi găn rơgao amăng bruă pơtô pơblang, jak iâu mơnuih ƀôn sang, pơđĭ tui tơlơi thâo hluh, tơlơi thâo amăng bruă mă kơ tơhan hơđăp, pơđĭ tui tơlơi gơgrong ba mơ̆ng tơhan hơđăp amăng bruă pơgang ayuh hyiăng anih dŏ jum dar.

Nay Jek: Pơblang