VOV4.Jarai - Mơguah lơ 11/1, ƀơi Hà Nội, Sang phat kơđi pơphun Jơnum bơkơtuai “Pơplih pơkra phiah phiăn truh thun 2030, anăp nao thun 2045 djơ̆ hăng tơlơi rơkâo amăng pơjing, pơgiong Kơnuk kơna tui hơdră xã hội chủ nghĩa Việt Nam”. Ding kơnong Ding jum kơđi čar, Khua mir sir ơi Nguyễn Xuân Phúc, Khua anom bruă git gai pơplih pơkra phiah phiăn dêh čar, Khua khul git gai akŏ bruă “Hơdră pơjing hăng pơgiong Kơnuk kơna tui hơdră xã hội chủ nghĩa Việt Nam truh thun 2030, anăp nao thun 2045” nao jơnum hăng đĭ pơhiăp amăng mông jơnum. Đĭ pơhiăp amăng mông jơnum, Khua mir sir ơi Nguyễn Xuân Phúc rơkâo kiăng hơmâo hơdôm hơdră pơplih pơkra glăi phrâo mơng anai truh thun 2030, anăp nao truh thun 2045 djơ̆ hăng tơlơi rơkâo sit nik amăng dêh čar hăng tui rơnuk pơđĭ kyar hrŏm amăng jar kmar. Đing nao hơdôm hơdră bruă pơplih amăng pơphun hăng bruă mă mơng Sang phat kơđi; pơpha tong ten amăng bruă git gai mơng sang phat kơđi kiăng pơhlôm brơi tơlơi dưi kơplah wah djop gưl amăng sang phat kơđi; pơplih phrâo, pơgiong hră pơ-ar ƀom kiơng brơi klă hloh.

Siu Đoan: Pơblang