VOV4.Jarai-Lơ 4/8, ƀơi ƀôn prong Hồ Chí Minh pok pơhai jơnum čom puang tal rơnuč ruah mă hơdôm jơlan hơdră rơgơi hloh tal pơplông Hơdră pơtui jua pơhiăp dêh čar tal XV thun 2022. Ơi Đồng Mạnh Hùng, Khua anom čih pioh bruă mă pơtui jua pơhiăp, Khua čih pioh kơ tal pơplông pơtui jua pơhiăp dêh čar tal XV brơi thâo, anai lĕ tal pơplông jua pơhiăp hơmâo lu jơlan hơdră mơ-it nao pơplông hloh, djop 63 boh tơring čar, ƀôn prong hăng lu anom bruă gah Gong phun jua pơhiăp Việt Nam.

Thun anai mơ̆n hơmâo lu jơlan hơdră pơplông hloh, truh kơ 500 mơta tơlơi pơhing, jơlan hơdră. Hơdôm jơlan hơdră tơlơi čih dưi ruah ba čom puang tal rơnuč ƀuh hiam klă, hơmâo čih glăi tơlơi pơhing tŭ yua kơ tơlơi hơdip ră anai. Ƀuh rơđah ñu, hơdôm bruă mă ngă tui Hră pơtrun ping gah dêh čar tal XIII dưi ngă tui sit nik amăng tơlơi hơdip mơda, tơlơi bong glăi hăng Covid 19, hơdôm bruă mă rŭ glăi bơwih ƀong huă laih anun pơđĭ kyar bơwih ƀong huă. Biă mă ñu, hơmâo lu tơlơi čih pơhing ră ruai kơ gru hiam mơnuih klă, mă bruă djơ̆.

Pơdă rup "Boh tơhnal bơwih ƀong huă mơnuih mơnam ƀôn prong HCM"

Anai lĕ, hơdôm boh tơhnal tŭ yua blung a mơ̆ng tal pơplông pơtui jua pơhiăp dêh čar ta thun anai. Sa tơlơi phrâo dơ̆ng amăng tal pơplông thun anai, Khul čom puang pơsit apah pri tơlơi bơni mơnuih hơmâo đok pơhiăp rơgơi, mơak  hloh, kiăng pơpŭ kơ ƀing pơhiăp hăng pơđok thâo rơgơi ngă mơak mơnuih hmư̆, pơpŭ kơ ƀing lăi pơthâo jơlan hơdră pơtui jua pơhiăp thâo hloh, jao 2 pri: Tơlơi kơhnâo dăp hơdră laih anun ngă tui boh thâo ia rơgơi hăng mrô pơtui jua pơhiăp.

 Amăng  jơlan hơdră ngă bruă mơng Jơnum pơplông pôr pơhiăp dêh čar tal 15, ƀơi Gong phun pơtui jua pơhiăp Mơnuih ƀon sang ƀon prong Hồ Chí Minh glăk pơphun pơdă prưng “Tơlơi dưi ngă amăng bruă bơwih ƀong huă mơnuih mơnam ƀon prong Hồ Chí Minh” hăng “Tơlơi dưi pơđĭ kyar mơng Gong phun pơtui jua pơhiăp Mơnuih ƀon sang ƀon prong”. Pơdă prưng “Ƀon prong Hồ Chí Minh hơdeč hmar - pơđĭ kyar - thâo khăp pap”  pơdah pơƀuh 60 pok rup hăng lu hơbô̆ bruă bơwih ƀong hmư̆ hing, lăi nao abih bang bruă pơđĭ kyar bơwih ƀong huă, kơđi čar, gru hrua, mơnuih mơnam mơng ƀon prong amăng hơdôm thun giăm anai.

Pơdă prưng “Tơlơi dưi pơđĭ kyar mơng Gong phun pơtui jua pơhiăp Mơnuih ƀon sang ƀon prong Hồ Chí Minh” ba pơƀuh hơdôm hră pơ-ar, rup, gơnam yua lăi nao hrơi mông akŏ pơdong hăng pơđĭ kyar mơng Gong phun pơtui jua pơhiăp Mơnuih ƀon sang ƀon prong Hồ Chí Minh amăng rơbêh 40 thun rơgao.

Amăng anun, hơmâo hơdôm jơlan hơdră djă gru mơng Gong phun jua pơhiăp Mơnuih ƀon sang ƀon prong Hồ Chí Minh kah hăng: Jơlan hơdră adoh suang làn sóng xanh, Jơlan hơdră adoh cải lương Bông luá vàng; Pri juă rơdêh tang wang Nam Kỳ Khởi Nghĩa, ...Ƀơi anih pơdă prưng anai, ăt hơmâo lu dram gơnam mơng đưm hlâo, măi mok ngă bruă mơng ƀing hyu mă tơlơi pơhing phrâo, mơng pô dăp hơdră Gong phun pơtui jua pơhiăp VOH amăng djŏp rơwang thun.

Nay Jek-Siu H’Mai: Pơblang