VOV4.Jarai - Mơguah anai (30/6) ƀơi Hà Nội, Ding jum kơđi čar pơphun jơnum đơ đam dêh čar klah čun 10 thun bruă pơgang pơgăn hưp ƀong kông ngăn, tơlơi ngă soh rơwang mơng thun 2012-2022, gah yŭ tơlơi git gai mơng Khua git gai Ping gah dêh čar ta ơi Nguyễn Phú Trọng.

Bruă jơnum dưi pơphun kiăng pơsit bôh nik bôh tơhnal dưi ngă, hơdôm tơlơi akă dưi ngă, dô̆ tơdu muan mơng bruă pơgang, pơgăn hưp ƀong kông ngăn, bruă ngă soh amăng 10 thun rơgao hăng tơdơi rơbêh kơ 1 thun ngă tui Tơlơi pơtrun pơsit Jơnum tal 13 mơng Ping gah; črâo rơđah bôh than ba truh, mă tŭ tơlơi găn rơgao, ba tơbiă bruă mă, jơlan pơsir phun pơgang pơgăn hưp ƀong kông ngăn, bruă ngă ƀu klă pơ̆ anăp anai. Lăi pơthâo abih, tŭ ư hrom thâo hăng ngă bruă, pok pơhai ngă tui ba glăi bôh tơhnal hơdôm hơdră pơtrun, bruă mă phrâo mơng Grŭp mă bruă Ping gah dêh čar ta, Ding jum kơđi čar, Grŭp git gai bruă Ping gah kơ pơgang pơgăn hưp ƀong kông ngăn, bruă ngă soh, biă ñu lĕ bruă pơdŏng hăng pok pơhai bruă mă mơng Grŭp črâo ba gưl tơring čar kơ pơgang pơgăn hưp ƀong kông ngăn, tơlơi ngă soh./.

Siu H’ Prăk: Pô pơblang