VOV4.Jarai - Mơguah lơ 25/4, ƀơi Ƀirô Kơnuk kơna, Anom bruă git gai dêh čar kơ bruă pơgang ayuh hyiăng pơplih sat gum hrŏm hăng Jơnum min dêh čar pơhlôm hlâo kơ ayuh hyiăng pơplih sat hăng djru brơi ană mơnuih pơphun Jơnum đơ đam dêh čar kơ bruă pơgang ayuh hyiăng pơplih sat hăng djru ană mơnuih thun 2022.

Đĭ pơhiăp amăng mông jơnum, Khua ding jum ngă hmua hăng pơđĭ kyar ƀon lan ơi Lê Minh Hoan, kơ-iăng khua anom bruă git gai brơi thâo, thun 2021, mah djop dêh čar amăng rŏng lŏn tơnah gir run abih pran kiăng pơgang, pơhlôm hlâo tơlơi truh sat samơ̆ ăt ngă 16.000 čô mơnuih djai hăng rơngiă, ngă rơngiă rơbêh 340 klai đôlar Mi hăng bơbeč nao djop mơta kơ tơlơi hơdip mơda, bơwih ƀong huă-mơnuih mơnam ƀơi lu dêh čar, hăng amăng kual. Tui hăng pơhŭi hlâo mơng anom bruă wai lăng rơngĭt adai lŏn mơnai dêh čar, thun 2022 amra ƀuh kơthel pưh rai kơtang phara hăng giăm 10-12 kơthel hăng ayuh hyiăng pơplih sat amăng kual ia rơsĭ ƀuh hlâo anun. Tui krăp lăng ayuh hyiăng pơplih mơng akŏ thun trun ră anai, ƀing ta amra ƀuh, ayuh hyiăng amăng thun 2022 tŏ tui pơplih phara hăng rĭm thun.

Siu Đoan: Pơblang