Jơlan gah kơsem min, ba tơbiă dưm dăp hơdôm bôh anom gah hơdôm Grŭp Ping gah, Gong gai hăng Khua pơ ala mơnuih ƀôn sang sit nik dưi hmâo Khua Grŭp pơphun bruă Ping gah dêh čar ơi Lê Minh Hưng lăi pơthâo amăng mông Jơnum lơ 1/12 ƀơi anăp rơbêh kơ 1 klăk 300 rơbâo čô mơnuih ping gah amăng đơ đam dêh čar. Khua Grŭp pơphun bruă Ping gah dêh čar ơi Lê Minh Hưng hmâo lăi pơthâo hơdôm jơlan gah rơđah pioh dưm dăp, rơguăt hơdôm ƀirô Ping gah, Gong gai dêh čar, Khua pơ ala mơnuih ƀôn sang, Jơnum min djop djuai ania mơnuih mơnam dêh čar, hơdôm khul grŭp kơđi čar – mơnuih mơnam hăng hơdôm khul mơnuih ƀôn sang yua Ping gah, Kơnuk kơna jao bruă ... tui jơlan gah sa ƀirô ngă tui lu bruă, sa bruă kơnong kơ sa ƀirô git gai hăng gơgrong bruă phun, pơsir pơđut tơlơi bơrơkua gah bruă apăn, bruă jao, kah pha anih anom, bruă mă. Hơdôm bôh ƀirô, khul grŭp hlâo adih hmâo dưm dăp laih blung a ăt khom pel ĕp glăi tơlơi ba tơbiă, khom sut lui hơdôm khul grŭp tal 3. Tui hăng jơlan gah dưm dăp, pơmut hrŏm dưi hmâo Khua Grŭp pơphun bruă Ping gah dêh čar lăi pơthâo amra pơmut hrŏm ƀiă biă mă ñu hmâo 4 bôh ƀirô Ping gah gah dêh čar, hrŏ trun 5 ding jum, 2 ƀirô gah Gong gai dêh čar, hrŏ trun 4 jơnum min mơ̆ng Khua pơ ala mơnuih ƀôn sang hăng 1 ƀirô gah Jơnum min apăn bruă Khua pơ ala mơnuih ƀôn sang...

Gah bruă bơwih ƀong, mơnuih mơnam, Khua dêh čar ta ơi Phạm Minh Chính brơi thâo, tơlơi bơwih ƀong – mơnuih mơnam 11 blan rơgao hmâo laih lu bôh tơhnal yôm phăn, klă hloh bơhmu hăng hlâo amăng kah hăng abih bang hơdôm bruă. Pơkă hlâo abih bang 15 tơhnal pơkă biă ñu dưi ngă hăng hloh kơ kơčăo bruă pơkă. Đĭ kyar sa thun him lăng hmâo rơbêh kơ 7%. Gong gai dêh čar pơsit thun 2025 lĕ thun đĭ kyar truh akô̆ pơkă, hrưn đĭ ba glăi bôh tơhnal prong hơdôm tơhnal ba tơbiă, tơhnal pơkă mơ̆ng kơčăo bruă 5 thun 2021-2025. Pơhiăp črâo ba amăng mông jơnum Khua git gai Ping gah dêh čar ta ơi Tô Lâm lăi lĕ, kiăng hmâo tơhnal pơkă pơđĭ kyar bơwih ƀong - mơnuih mơnam mơ̆ Tơlơi pơtrun pơsit Jơnum tal 13 hmâo ba tơbiă, ƀing ta khom pơplih phrâo tơlơi pơmin, khom pơkă sit, khom pơplih, khom hrưn đĭ pô; rơkâo, hơdôm gưl, hơdôm gơnong bruă mơ̆ng dêh čar truh plơi pla khom pơsit pran kơđi čar dlông hloh amăng ngă tui hơdră pơtrun anai; mơnuih apăn bruă git gai, mơnuih apăn akô̆ gưl ping gah, ƀirô khom ngă gru hlâo, gơgrong hlâo, khut khăt amăng ngă tui bruă hmâo jao. Khom pơplih phrâo hloh dong gah hơdră pơkă, khut khăt ngă tui bruă hmâo jao. Khom pơjing dong tơlơi pơplih hloh dong hơdră pơkă, pơtlaih abih hơdôm tơlơi tơnap, tơlơi gun, anô̆ dô̆ đôm pioh pok tơbiă ngăn rơnoh hăng pơplih bruă čar kơtang tit, pơčeh phrâo anih anom gêh gal pioh pơđĭ kyar./.