VOV4.Jarai - Mơguah lơ 29/7, ƀơi ƀirô mă bruă Kơnuk kơna, Grŭp črâo ba klah čun ngă tui Tơlơi phiăn lŏn drŏn hăng pơdŏng Rơwang bruă Tơlơi phiăn lŏn drŏn (pơplih pơkra) jơnum tal sa. Kơ-iăng Khua dêh čar ta ơi Lê Văn Thành, Khua Grŭp črâo ba git gai mông jơnum. Tui hăng Ding jum kông ngăn dlai tlô hăng rơhuông adai lŏn mơnai, tơdơi rơbêh kơ 8 thun pơphun ngă tui Tơlơi phiăn lŏn drŏn, bruă wai lăng lŏn drŏn hmâo laih hơdôm bôh tơhnal yôm phăn. Khă hnun hai amăng ngă tui tơlơi phiăn ăt dô̆ mơn anô̆ akă dưi ngă, kah hăng: Pơkă kual akă pơhlôm abih bang, pơlir hơbit hăng ha amăng plĕ; Bruă pơhrui glăi lŏn, pơ ala glăi, djru gum, pơdŏng glăi anih dô̆ hơđong hmâo anih akă pơhlôm djơ̆ hrom hăng bôh tŭ yua mơng mơnuih ƀôn sang; Tơlơi bơrơsua, ƀong kiơng hăng ngă soh tơlơi phiăn gah lŏn drŏn dô̆ ngă tơnap đôč... Yua anun, bruă pơdŏng Rơwang bruă Tơlơi phiăn lŏn drŏn (pơplih pơkra) jing kiăng biă. Klah čun bruă jơnum, Kơ-iăng Khua dêh čar ơi Lê Văn Thành rơkâo Grŭp čih pơkra tơlơi phiăn lŏn drŏn (pơplih pơpkra) khom kiăo tui djơ̆ Tơlơi pơtrun pơsit mrô 18 mơng Bruă jơnum tal 5, Grŭp mă bruă Ping gah dêh čar ta tal 13 kiăng pơhlôm pơđĭ tui bôh tŭ yua, bôh tơhnal wai lăng hăng mă yua lŏn, pơjing pran ngă brơi lŏn ia ta jing lŏn ia pơđĭ kyar hmâo prăk pơhrui glăi lu./.

Siu H’ Prăk: Pơblang