50 thun yap mơ̆ng hrơi pơklaih rơngai, Ping gah hăng mơnuih ƀôn sang tơring glông Kon Plong hơmâo ngă tui djơ̆ gru grua thâo gum pơgôp, pơčeh phrâo, tŭ mă lu boh tơhnal pơđĭ kyar bơwih ƀong huă mơnuih mơnam. Pơđok hră pơthâo ƀơi mông jơnum lăi rơđah: “Kon Plong pơblih tui rim hrơi, tơlơi hơdip mơda mơnuih ƀôn sang jai hrơi hiam mơak hloh. Sit nik yơh abih bang tơhan khin hơtai pơsăn drơi jăn yua kơ lŏn ia hlâo adih rơbuh đih tuh drah pơčah asar yua kơ plơi pla, lŏn ia hơmâo sa tơlơi čang rơmang hrŏm hơbit lĕ Lŏn ia hlăk pơklaih rơngai laih, Mơnuih ƀôn sang trơi pơđao yâo mơak”.

Pơhiăp đĭ ƀơi mông jơnum, ơi Lê Ngọc Tuấn, Khua Jơnum min mơnuih ƀôn sang tơring čar Kon Tum, lăi pơtong: “Hơdor glăi 50 thun Blah dưi ƀơi Măng Đen, pơklaih rơngai tơring glông Kon Plong lĕ mông hơdor glăi gru grua phun dêh čar hing ang hăng pơ-ư ang prong kơ gru grua khin hơtai. Amăng rơnuk ngă bruă hơkrŭ phrâo, anom bruă ping gah, khua pơ ala mơnuih ƀôn sang, jơnum min mơnuih ƀôn sang, jơnum min djop djuai ania mơnuih mơnam Việt Nam tơring čar đăo kơnang biă mă kơ Ping gah, ling tơhan hăng mơnuih ƀôn sang djop djuai ania tơring glông Kon Plong ăt kiăo tui djă pioh gru grua đưm hăng gir run ngă giong bruă jao kơđi čar dưi hơmâo ping gah hăng kơnuk kơna jao brơi.