Pơđok tơlơi čih pơthâo ƀơi mông jơnum lăi rơđah, lơ 6/1/1946 jing gru kơđŏm yom pơphăn biă mă, pok brơi sa rơnuk pơtong rơđah tơlơi dưi ngă pô mơ̆ng djuai ania Việt Nam. Boh tŭ yua tal plĕ hră anai kiăng pơtong rơđah tơlơi dưi ngă pô lŏn ia mơ̆ng mơnuih ƀôn sang Việt Nam, mơ̆ng bưng bôt ngă hlun mơnă, tơgŭ đĭ sua glăi tơlơi rơngai, pơphun rai Kơnuk kơna kơ ta pô, hăng djop tơlơi găl, phiăn pơkă dưi pơ ala brơi kơ mơnuih ƀôn sang amăng dêh čar hăng jar kmar, jing kơnuk kơna yua mơnuih ƀôn sang ruah đĭ blung a ƀơi kual Dơnung ngŏ ASIA. Abih amăng 80 thun laih rơgao, hăng 15 gưl ngă bruă, guang bruă apăn, mah amăng thun blan hiư̆m pă hai, anom bruă pơ ala mơnuih ƀôn sang dêh čar hơmâo djru hrŏm prong prin amăng bruă hơkrŭ hmư̆ hing mơ̆ng ping gah, djuai ania ta, lăp hăng anom bruă pơ ala prong hloh kơ mơnuih ƀôn sang, anom bruă hơmâo tơlơi dưi prong hloh laih anun jing anih pơtum lu tơlơi pơmin, ia rơgơi, tơlơi kiăng mơ̆ng djuai ania.

Đĭ pơhiăp ƀơi mông jơnum, Khua git gai ping gah ơi Tô Lâm sa wơ̆t dơ̆ng lăi pơtong, mơ̆ng gru kơđŏm pioh đưm adih thun 1946, anom bruă khua pơ ala mơnuih ƀôn sang dêh čar Việt Nam ƀu pơdơi ôh, pơđĭ kyar na nao, kiăng pơtong rơđah tơlơi gơgrong ba phun amăng tơlơi hơdip mơda mơnuih ƀôn sang amăng dêh čar, bruă kơđi čar-tơlơi phiăn lŏn ia, akŏ pơjing phiah phiăn phun kiăng čih pơkra rai tơlơi phiăn kơnuk kơna git gai mơnuih mơnam hăng tơlơi phiăn mă anăn lŏn ia mơnuih ƀôn sang ngă pô Việt Nam. Anăp nao hơdor glăi 100 thun akŏ pơjing rai ping gah thun 1930-2030, 100 thun akŏ pơdong kơnuk kơna lŏn ia thun 1945-2045 hăng ngă tui djơ̆ tơlơi kiăng mơ̆ng Việt Nam jing lŏn ia pơđĭ kyar, kơjăp kơtang, pơdrong sah hăng mơak hlak, Khua git gai ping gah ơi Tô Lâm lăi pơthâo tơlơi gơgrong ba mơ̆ng anom bruă khua pơ ala mơnuih ƀôn sang dêh čar lĕ čih pơkra tơlơi phiăn git gai wai lăng lŏn ia sa bruă mă yom hloh, pok brơi jơlan pơblih phrâo thâo pơčeh, pơtrut pơđĭ kyar hmar hăng hơđong kơjăp brơi kơ lŏn ia.