Hơdôm boh tơring jơnum hrŏm hơduah ĕp bruă mă hơmâo: Ninh Bình, Bắc Giang, Bắc Ninh, Hải Phòng, Thái Nguyên, Phú Thọ, Bắc Kạn, Lạng Sơn. Ƀơi mông jơnum hơduah ĕp bruă mă hơmâo rơbêh 160 anom bơwih ƀong ruah mơnuih mă bruă, hăng giăm 28 rơbâo čô mơnuih mă bruă.

Amăng anun, anom bơwih ƀong pơkra gơnam lu hloh hăng rơbêh 50%, mrô dŏ glăi amăng bruă pơkŏn: sĭ mơdrô bơwih brơi, pơdŭ pơgiăng, pơtô hrăm, tuai hyu ngui. Kiăng ruah mơnuih mă bruă rơgơi, hrăm mơ̆ng cao đẳng truh kơ đại học hơmâo giăm 27%. Kiăng ruah mơnuih mă bruă gưl trung cấp, kông ñơn kĭ thuâ̆t hơmâo 42%. Kiăng ruah mơnuih mă bruă hrăm abih anih 12 hơmâo rơbêh 31%. Bruă hơduah ĕp mơnuih mă bruă ƀơi mông jơnum ĕp bruă mă anai pơƀut lu hloh ƀơi hnưr thun 18 truh kơ 25 thun.