Khua dêh čar brơi thâo, truh ră anai ƀing ta dưi djop 15 tơhnal pơkă bơwih ƀong huă mơnuih mơnam thun 2024, biă mă ñu rơnoh pơđĭ kyar rơbêh 7%. Anai lĕ, sa boh tơhnal ngă hrŏm amăng lŏn ia, amăng anun hơmâo tơlơi djru hrŏm prong biă mă amăng bruă pơtom hiăp bơwih ƀong huă. Khua dêh čar rơkâo, ƀing khua pơ ala, khua anom bruă pơ ala dêh čar mă bruă ƀơi dêh čar tač rơngiao khom sem lăng, kơsem min hơdră pơtrut hăng pơblih lu hloh kiăng pơđĭ kyar hmar ƀiă dơ̆ng pơ anăp adih, ngă hiư̆m thâo, gơyut gơyâo jar kmar rai tuh pơ alin ƀơi Việt Nam.

Khua dêh čar lăi, ƀing ta khom pơtong lăng, tŭ mă rơnoh prăk amăng dêh čar yơh phun hăng hơđong hloh, samơ̆ rơnoh prăk tuh pơ alin mơ̆ng tač rơngiao ăt yom mơ̆n, kiăng pơtrut kơtang hloh, khom kơtưn amăng bruă boh thâo ia rơgơi; pơtrut tơlơi bơwih ƀong huă tui anih anom sĭ mơdrô; pơtum bruă pơtô hrăm mơnuih mă bruă thâo rơgơi, pơhưč mơnuih kơhnâo kơhnăk, pơblih pơčeh phrâo khom djơ̆ hăng bruă git gai wai lăng thâo rơgơi mơ̆n.