VOV4.Jarai - Tlam lơ 29/8, ƀơi Hà Nội, pơphun Jơnum khua mua pơ ala Khul ia jrao kyâo bơrơkal mriah Việt Nam tal 11, rơwang thun 2022-2027, hơmâo rơbêh 500 čô khua rơgơi mơbruă pơ ala brơi kơ rơbêh 7 klăk 200 rơbâo čô khua, ding kơna, mơnuih djru bruă, hlăk ai tơdăm dra Khul kyâo bơrơkal mriah amăng dêh čar. Mông Jơnum khua mua Khul ia jrao kyâo bơrơkal mriah Việt Nam tal 11 hăng bruă yôm phun, amăng anun pơtŏng glăi boh than hơmâo ngă amăng Khul hăng bruă Kyâo bơrơkal mriah rơwang thun 2017-2022; pơssit bruă kiăng ngă, hăng hơdôm hơdră pơtrut tui klă hloh bruă amăng Khul rơwang thun 2022-2027. Rơwang bruă phrâo rơgao, Khul ia jrao kyâo bơrơkal mriah đơ đam dêh čar ta mă bruă pơčeh phrâo, pơphun ngă lu bruă hiam klă, khăp pap djru brơi mơnuih tơnap tap, hăng mrô prăk ngă bruă rơbêh 23 rơbâo klai, rim thun hơmâo djru ba rơbêh 18 klăk wơt čô mơnuih. Ƀơi mông jơnum lok 1, Jơnum ruah khua Khul ia jrao kyâo bơrơkal mriah Việt Nam hơmâo ruah Khul khua apăn bruă git gai Khul ia jrao bơrơkal mriah Việt Nam tal 11, rơwang thun 2022-2027 hăng pơphun Jơnum Khul khua apăn bruă git gai Ping gah Khul tal 11, lok 1.

Siu H’Mai: Pơblang