Jơnum lok 10, khua pơ ala mơnuih ƀôn sang tơring čar Lâm Đồng tal 10 pơsit, bruă brơi hră pơkra, lu biă ñu lĕ man pơkra sang dŏ hơjăn pô laih anun bruă wai lăng kơnuk kơna kơ hơđong bruă man pơkra ƀơi Đà Lạt lăi hơjăn, tơring čar Lâm Đồng lăi hrŏm dŏ hơmâo lu mơn tơlơi aka ƀu djơ̆, ngă bruă dŏ tơdu, ƀu kơjăp, pioh hơmâo tơlơi truh răm ƀăm kơtang. Amăng anun, tơlơi truh tơhlŏm taluy, tơhrô lŏn ƀơi anih man pơkra ngă kơ 2 čô mơnuih djai hăng 5 čô rơka ƀơi phường 10, plơi prong Đà Lạt mơguah lơ 29/6 jing tơlơi ta kiăng pơƀuh nao.

Pơhiăp kiăo tui tơlơi pơhmư̆ hăng lăi glăi tơlơi tơña, ơi Trần Văn Hiệp, Khua jơnum min mơnuih ƀôn sang tơring čar Lâm Đồng lăi, bruă čuk pơkra, ngă hơđong bruă man pơkra plơi prong khŏm kiăng kơjăp hloh, khŏm pơčrông hăng ba tơbiă hơnong pơkă rơđah rơđông kơ rim kual, biă ñu ƀơi anih lŏn kơdư dong đĭ, pleh ploh taluy kơtang.