Khua git gai Ping gah dêh čar ơi Tô Lâm brơi thâo, amăng jơnum anai, gơnong glông pơčrông sai, pơgôp hiăp hăng 5 boh tơhnal, amăng anun hơmâo 3 mơta bruă akŏ phun anun lĕ: Lăng glăi tơlơi pơtrun mrô 18 mơng gơnong glông kơ pơplih phrâo, dưm dăp pơphun anih anom mă bruă hơbot,  ngă bruă klă, tŭ yua; akŏ bruă pơhrua hơnong pơkă pơđĭ kyar GDP thun 2025 mơng 8% pơ glông; bruă ruah mơnuih apăn bruă tui tơlơi glăm ba gơnong glông; lăng glăi tơlơi git gai, wai lăng mơng Ding jum kơđi čar, Khul git gai amăng thun 2024; lăi pơthâo bruă pel ĕp, krăo lăng thun 2024 hăng jơlan hơdră pel ĕp, krăo lăng thun 2025.

Kơ bruă klah čun tơlơi pơtrun mrô 18, Khua git gai Ping gah dêh čar ơi Tô Lâm lăi pơtong, anai lĕ boh tơhnal akŏ phun mơng Jơnum tal anai. Ding jum kơđi čar, Khul git gai ping gah hơmâo git gai khut khăt, ječ ameč pok pơhai tơlơi pơtrun mrô 18 hăng dưm dăp anih anom mă bruă phrâo hăng pran jua “đuăi rah dưm dăp rah”, amăng ten đơi ôh mơ̆ anăm hăt he, pơhlôm djơ̆ tơlơi pơkă mơng Ping gah, tơlơi pơkă, jơlan gah git gai mơng gơnong glông.