Hơdôm hrơi giăm truh têt, yă H’Čơt Niê, djuai ania Êđê, dŏ ƀơi Ƀôn Tai, să Krông Jing, tơring glông Mdrak, hrŏm hăng sang anŏ dik dăk kih rơmet pưk sang đang atông. Ñu lăi, aka ƀu hơmâo ôh mông čơkă têt mơak amăng sang anŏ ñu kah hăng thun anai.

“Blan 6/2024, Khua mua sang bruă tơhan tơring glông Mdrak hơmâo djru 50 klăk prăk, Jơnum min djop djuai ania mơnuih mơnam Việt Nam tơring glông djru 50 klăk dơ̆ng. Sang anŏ gơmơi pơkom pioh ƀiă hăng čan prăk arăng pơdong hĭ hơmâo sang prong rơhaih 90 met karê. Ră anai, ƀing ding kơna amăng sang anŏ dưi hơmâo sang kơjăp hơđong yơh dŏ. Ƀong têt ẤtTỵ 2025 anai, abih bang sang anŏ gơmơi h'’n pran jua čơkă thun phrâo amăng sang phrâo, thun anai yơh ƀong têt mơak hloh mơ̆ng hlâo truh ră anai”.

Ăt kah hăng sang anŏ yă H’Čơt mơ̆n sang anŏ Y Sam Niê, djuai ania Êđê dŏ pơ Ƀôn Tai, ñu hok mơak thun anai čơkă têt amăng sang phrâo pơdong. Y Sam Niê hok mơak lăi:

“Kâo ƀu pơmin ôh dưi man pơdong sang phrâo či dŏ djơh hăng anai. Khua mua tơhan ƀơi tơring glông hăng Jơnum min djop djuai ania mơnuih mơnam tơring glông, djru rim sang bruă brơi 50 klăk prăk, sang anŏ gơmơi čan dơ̆ng 50 klăk man pơdong sang prong 60 met karê. Thun anai, sang gơmơi čơkă thun phrâo amăng sang phrâo, rơkơi bơnai hăng ană bă mơak biă mă, ƀu hŭi kơ hơjan ia ƀruač, angin pưh ôh. Ră anai, kâo kơnong gir run pơđĭ kyar bơwih ƀong huă, rông ană bă hrăm hră pơar đôč”.

Ơi Y Lương Êban, Khua Jơnum min djop djuai ania mơnuih mơnam Việt Nam să Krông Jing brơi thâo, amăng thun 2024, să hơmâo 54 boh sang anŏ ƀun rin dưi djru man pơdong sang “Gum pơgôp prong”. Hrŏm hăng anun, hơmâo rơbêh 400 boh sang anŏ giăm ƀun rin, mơnuih ƀôn sang djuai ƀiă hăng mơnuih pơdong sang, ming pơkra brơi sang tui hơdră mơ̆ng kơnuk kơna djru laih anun tơring čar Dak Lak gum hrŏm. Lu sang anŏ dưi mut dŏ amăng sang phrâo hơđong yơh. Ơi Y Lương Êban lăi:

"Rơnuč thun 2024, Jơnum min mơnuih ƀôn sang să hơmâo jŭ yap glăi abih, ĕp glăi hăng pơtong rơđah sang laih man pơdong anun lăp kah jao kơ sang anŏ hơmâo anăn kơnuk kơna djru pơdong sang nao dŏ, hŭi sang hyu ngă tŭ kơ hơmâo. Giong sem lăng, gơmơi ƀuh lu sang anŏ hok mơak soh. Lu sang anŏ lêng kơ čơkă têt Ất Tỵ thun 2025 amăng sang phrâo mơak mơai hăng ană plơi pla”.

Mdrak lĕ, sa amăng hơdôm tơring glông ƀun rin hloh tơring čar Dak Lak. Ngă tui bruă jak iâu “Abih bang amăng dêh čar gum tơngan hrŏm yua kơ mơnuih ƀun rin, ƀu lui hlơi dŏ glăi gah klôn ôh”, tui hăng tơlơi git gai mơ̆ng kơnuk kơna brơi  lŏm lui sang tơ̆i, sang phŏ, thun 2024, tơring glông hơmâo jak iâu man pơdong hơmâo 255 boh sang hăng pơkra glăi 190 boh sang djru kơ mơnuih ƀun rin, giăm ƀun rin. Rơnoh prăk tuh pơ alin giăm 50 klai. Kơ akŏ bruă lui sang tơ̆i, sang phŏ amăng thun 2025, Y Khoa Niê Kdăm Khua Jơnum min djop djuai ania mơnuih mơnam tơring glông Mdrak brơi thâo, tơring glông him lăng man pơdong phrâo 220 boh sang djru kơ sang anŏ tơnap tap:

“Ƀing gơmơi kiăng hơmâo dơ̆ng 18 klai pioh ngă tui bruă lŏm lui sang tơ̆i, sang phŏ kơ mơnuih ƀôn sang ƀun rin amăng tơring glông kiăng hơđong tơlơi hơdip mơda amăng thun 2025. Sang bruă djop djuai ania mơnuih mơnam Việt Mam tơring glông jak iâu ngă hrŏm jơlan hơdră tui Hră pơtrun mrô 90/QĐ-2022 mơ̆ng Khua dêh čar,jơlan hơdră mrô 1718 brơi lŏm lui sang  tơ̆i, sang phŏ hăng lu jơlan hơdră pơkŏn jak iâu sang bruă mơdrô djru. Akŏ bruă anai, him lăng ngă giong amăng blan 12/2025”.

Čơkă mơak hơdor glăi tal 120 thun hrơi akŏ pơdong tơring čar Dak Lak rơnuč blan 11 laih rơgao, Jơnum min djop djuai ania mơnuih mơnam tơring čar jak iâu, pơčruh man pơdang gum pơgôp brơi kơ sang anŏ ƀun rin, sang anŏ tơnap tap amăng plơi pla, djop să tơnap tap hloh amăng kual giăm guai dêh čar, kual mơnuih djuai ƀiă. Tơlơi jak iâu anai hơmâo lu mơnuih čơmah hăng sang bruă sĭ mơdrô, mơnuih apăn bruă kơnuk kơna dong yua djru hloh kơ 23 klai prăk, man pơdong giong hĭ 300 boh sang kơ mơnuih ƀun rin hlâo kơ truh hrơi ƀong têt Ất Tỵ. Amăng hơdôm boh sang dŏ phrâo anai, hơmâo jao glăi djop sang anŏ tŭ mă mut dŏ amăng sang phrâo čơkă têt mơak. Hơdôm bơbung sang “Gum pơgôp prong” hlăk pơjing rai pran kơtang pioh pơtrut mơnuih ƀôn sang gir run hloh mă bruă, hrưn đĭ kiăng pơklaih mơ̆ng ƀun rin, akŏ pơdong tơlơi hơdip mơda trơi pơđao, hyuk hyak hloh./.