Thun 2024, Khul git gai tơhan rŭi hyu hơdeč hơmâo ngă klă bruă pơphô hơdră ngă bruă hăng Ping gah, Kơnuk kơna, Ping gah Kông an, khua mua Ding jum kông an kơ bruă blah ngă pơgang rơnuk rơnua lŏn ia, hơđong mơnuih mơnam, pơgang ba khut khăt rơnuk rơnua djŏp tơlơi jơnum prong mơ̆ng lŏn ia; grup tuai mơ̆ng jar kmar rai čuă hăng mă bruă ƀơi Việt Nam.

Khua mir sir lăi rơđah, thun 2025 jing thun yôm biă mă, jing thun pơphun jơnum ping gah djŏp gưl anăp nao Jơnum ruah khua ping gah dêh čar tal 14 hăng hơdôm mông jơnum prong, yôm mơ̆ng lŏn ia. yua hnun, bruă kiăng ngă mơ̆ng tơhan rŭi hyu amăng thun 2025 hăng hơdôm thun pơ anăp dong glêh tơnap biă mă. Kiăng dưi ngă bruă amăng rơnuk phrâo, Khua mir sir kiăng tơhan rŭi hyu kơsem min, thâo hluh dlăm, ngă tui tŭ yua hơdôm jơlan hơdră, tơlơi pơtrun mơ̆ng Ping gah, tơlơi phiăn mơ̆ng Kơnuk kơna kơ bruă pơgang rơnuk rơnua lŏn ia, hơđong kjăp mơnuih mơnam, hăng akŏ pơdong khul ling tơhan amăng rơnuk phrâo.