Tŭ mă gơnam tết lĕ 500 rơbâo prăk mơng jơlan hơdră bơyan bơnga khăp pap yua khul ia jrao kyâo bơrơkal mriah tơring čar Dak Lak gum hrŏm hăng hơdôm anom bruă, khul grup, yă H’Wênh Byă, dŏ amăng ƀuôn Kroa B, să Čuôr Dăng, tơring glông Čư̆ Mgar hur har pran jua brơi thâo:

“Kâo amra yua prăk anai kiăng kơ blơi braih, kâo hok mơ-ak biă mă, yua rĭm hrơi hyu duñ get kơsu glêh glar biă mă mơ̆ sĭ ƀu hơmâo hlơi. Ră anai hơmâo tơlơi đing nao, ƀơk brơi gơnam, tơlơi gum djru anai ngă plai ƀiă tơnap tap, kâo hok mơ-ak biă mă”.

Kiăng kơ gum djru, juh pơ alum pran jua hmao tlôn brơi ƀing mơnuih ƀun rin, sang anŏ tơnap tap dưi čơkă thun phrâo hơmâo djop gơnam yua, Khul ia jrao kyâo bơrơkal mriah tơring čar Dak Lak hơmâo gum hrŏm hăng hơdôm anih anom čơmah ƀơk hơdôm rơtuh anung gơnam brơi kual tơnap tap, kual mơnuih djuai ania ƀiă. Hrŏm hăng bruă bơwih brơi tết, khul ăt pơlir hơbit pok pơhai hơdôm bruă djru brơi mơnuih mơnam anun lĕ: khăm pơjrao brơi tơgơi mơbah, ƀơk hră pơhlôm nua ia jrao, jao prăk djru hrăm hră hăng ƀơk brơi rơdêh dăng wang brơi čơđai sang hră tơnap tap hrăm hră rơgơi…

Laih dong, hơdôm khul hlăk ai, khul đah kơmơi, khul pơlir mơnuih mă bruă…ăt hơmâo pơphun lu bruă bơwih brơi tết kơ mơnuih ƀôn sang kual tơnap tap, kual giăm guai. Yă Võ Thị Ngọc, Kơ-iăng khua khul pơlir hơbit đah kơmơi tơring čar Dak Lak lăi pơthâo:

“Hăng khul pơlir hơbit đah kơmơi tơring čar hơmâo pơphun ƀơk gơnam brơi ƀing mơnuih tơnap tap hăng nua ñu 500 klăk prăk, pơphun jơlan hơdră tết khăp pap ƀơi tơring glông Krông Buk; gum hrŏm hăng đah kơmơi kual giăm guai, pơphun hơdôm bruă mă anăp nao đah kơmơi hăng ƀing čơđai ƀun rin amăng kual giăm guai ƀơi să Ia Lốp hăng Ea Bung. Pơ anăp anai amra tŏ tui pơphun hơdôm bruă ƀơi hơdôm boh ƀon lan hăng hơdôm kual tơnap tap”.

Truh ră anai, ƀơi tơring čar Dak Lak hơmâo rơbêh 55.200 boh sang anŏ hơmâo arăng ƀơk gơnam tết hăng abih tih nua ñu rơbêh 25 klai prăk. Tui yă Nông Thị Thu, Kơ-iăng Khua Jơnum min djop djuai ania mơnuih mơnam Việt Nam tơring čar Dak Lak, tơring čar hơmâo pơhlôm brơi djop sang anŏ ƀun rin, giăm ƀun rin lêng kơ hơmâo gơnam djru, hơmâo tơlơi gal kiăng mơ-ak čơkă thun phrâo tui jơlan gah “Anăm brơi hlơi ôh dŏ glăi gah tlôn”.

“Kah pơpha 1.550 anung gơnam hăng nua ñu rĭm thun lĕ 500 rơbâo prăk mă mơng keh prăk djru brơi mơnuih ƀun rin mơng tơring čar. Laih dong, gum hrŏm kjăp hăng hơdôm khul grup, ding kơna mơng Jơnum min, ngă tui hơdôm bruă bơwih brơi tết kơ mơnuih ƀun rin gơnong bruă bơkơnar kah hăng gum hrŏm hăng Jơnum min djop djuai ania mơnuih mơnam hăng hơdôm anih anom, ƀon lan pơphun hơdôm bruă mă ƀrô bơyan čơkă thun phrâo Ất Tỵ thun 2025”.

Hơdôm hrơi anai, jơlan hơdră “Tết tum jơngum-bơyan bơnga pơpŭ Ping gah” hăng “Sang čơ tết mơnuih mă bruă mut phung 2025” ƀơi tơring čar Dak Lak ăt phrâo pơphun lu bruă mă yôm phăn ngă pơđao pran jua mơnuih mă bruă. Amăng jơlan hơdră, khul pơphun hơmâo jao 400 anung gơnam brơi ƀing ding kơna, mơnuih mă bruă, nua ñu 800 rơbâo prăk sa anung; djru brơi prăk man pơdong 11 boh sang mơnuih mă bruă mut phung tal anai, amai H’Ben Mlô, nai pơtô sang hră čơđai anet Ea Hding, tơring glông Čư̆ Mgar brơi thâo:

“Hrơi anai kâo hok mơ-ak biă mă lơm hơmâo hơdôm anom bruă djru brơi kơ kâo sa boh sang mơnuih mă bruă mut phung thun 2025. Kâo pơmĭn amăng akŏ blan 3 anai amra man pơdong sa. Amăng pran jua kâo mơ-ak biă mă”.

Jơlan hơdră “Sang čơ tết mơnuih mă bruă mut phung thun 2025” ƀơi Dak Lak pơphun hơmâo tơlơi mut hrŏm mơng 50 anih anom, anom bơwih ƀong sĭ mơdrô. Hăng mrô gơnam tam kiăng yua giăm 1 klai prăk, ƀơi anai pơphun lu bruă mă yôm phăn anun lĕ ƀơk hră blơi gơnam soh sel, khăm pơjrao, pơblang brơi tơlơi phiăn hăng hơdôm jơlan hơdră ngui ngor brơi ding kơna, mơnuih mă bruă. Dưi blơi gơnam kiăng amăng bơyan tết, amai Tống Thị Thu Thoi, mă bruă gah kông ti in Dak Lak brơi thâo:

“Abih bang adơi amai lêng kơ nao sang čơ tết mơnuih mă bruă mut phung 2025, rai pơ anai ƀuh lu anih pơdă gơnam djop mơta. Rai pơ anai hơmâo lu gơnam sĭ rơgêh, khul mơnuih mă bruă mut phung ƀơk brơi hră blơi gơnam kiăng kơ plih mă gơnam pơyơr. Lăi hrŏm, hơmâo lu tơlơi djru, lu gơnam ƀơk brơi kông ñơn, mơnuih mă bruă”.

Hơmâo thâo, bơyan čơkă thun phrâo tui phiăn juăt Ất Tỵ thun anai, tơring čar Dak Lak hơmâo mă yua rơbêh 75 klai prăk kiăng kơ nao tơña bla, ƀơk gơnam brơi ƀing mơnuih tui hơdră djru hăng mơnuih mă bruă. Hrŏm hăng anun, 138 anih anom, khul ling tơhan, kông ang, anom wai lăng đang glai amra tŭ mă gơnam ƀơk nua ñu mơng 3-7 klăk prăk. Khua mua tơring čar ăt amra nao čuă hăng ƀơk 54 anung gơnam brơi mơnuih djru hơkrŭ ba gru hăng hơdôm anin anom amăng tơring čar./.