Mơng hơdôm hrơi blung a thun phrâo, ling tơhan wai pơgang guai tơring čar Gia Lai pok pơhai jơlan hơdră “Bơyan bơnga giăm guai pơđao pran jua mơnuih ƀôn sang” ƀơi hơdôm boh să giăm guai hơdôm boh tơring glông Ia Grai, Đức Cơ, Chư Prông, tơring čar Gia Lai. Jơlan hơdră anai lĕ hrơi mông kiăng ling tơhan wai pơgang guai pơdong puih kơđông tơhan amăng ƀon lan hrŏm hăng mơnuih ƀôn sang klon ƀan tek, ngui atông čing ayuh suang, pơbưp nao rai kiăng pơlir pran khăp pap tơhan-mơnuih ƀôn sang. Ƀing mơnuih čơmah pok anih sĭ gơnam 0 prăk, mơng anun, jao brơi neh met wa hơdôm rơtuh anung gơnam hơmâo abăn, mông sơker, braih…pơphun khăm pơjrao, ƀơk jrao brơi neh met wa.

Tha plơi Rčom Trom, 84 thun, dŏ amăng plơi Bua, să Ia Phnôn, tơring glông Đức Cơ brơi thâo, neh met wa amăng plơi pla hơmâo ƀing apăn bruă ling tơhan wai pơgang guai djru brơi lu amăng tơlơi hơdip mơda anun lĕ črâo brơi bruă pla pơjing, rông hlô, man pơdong sang….Tết trun rai laih, tơhan wai pơgang guai ăt pơphun khăm pơjrao brơi hăng ƀơk jrao brơi hơdôm boh sang anŏ tui hơdră djru, sang anŏ tơnap tap ngă ñu hok mơ-ak biă mă.

“Hăng tơlơi gơgrong lĕ tha plơi, bruă kơ kâo lĕ tum pơƀut neh met wa amăng plơi pla, tui hăng kâo ƀuh neh met wa hur har hok mơ-ak biă mă lơm hmư̆ hing ling tơhan rai čuă jơmư, ƀơk gơnam, laih dong khăm pơjrao, ƀơk jrao brơi dong. Mơng bruă mă yôm phăn anai ăt pơjing pran đăo gơnang mơng neh met wa hăng tơhan wai pơgang guai, mơng anun ba glăi tơlơi jê̆ giăm, bă blai pran khăp pap tơhan hăng mơnuih ƀôn sang”.

Kiăng pơgang rơnuk rơnua ƀơi guai lŏn ia, tơhan wai pơgang guai tơring čar Gia Lai lêng kơ đing nao bruă pơtô ba mơnuih ƀôn sang, pơjing pran đăo gơnang kjăp phik mơng mơnuih ƀôn sang. Hăng jơlan gah “tlâo kiăo tui, pă gum hrŏm” (kiăo tui lăng amăng plơi pla, jê̆ giăm mơnuih ƀôn sang, krăo lăng tơlơi sit nik; ƀong hrŏm, dŏ hrŏm, mă bruă hrŏm, hiăp boh pơhiăp hrŏm mơnuih djuai ania ƀiă), tơhan wai pơgang guai tơring čar Gia Lai lêng kơ gum hrŏm mơnuih ƀôn sang pơplih tơlơi pơmĭn, bruă mă amăng tơlơi bơwih ƀong huă, pơjing tơlơi hơdip hiam klă amăng plơi pla, lui hĭ tơlơi phiăn ƀu klă hiam. Hơdôm hrơi blung a thun phrâo 2025, hơdôm bruă mă yôm phăn, dik dak yua hơdôm puih kơđông tơhan pơphun, pok pơhai djru brơi tơlơi hơdip kơ neh met wa jai pơhlôm hơmâo djop mơta, neh met wa hur har, đăo gơnang, hrŏm hăng ling tơhan wai pơgang guai lŏn ia. Đại tá Nguyễn Văn Nghị, kơ-iăng khua anom bruă git gai tơhan wai pơgang guai tơring čar Gia Lai brơi thâo:

“Truh bơyan bơngai, Anom bruă git gai tơhan wai pơgang guai tơring čar Gia Lai hơmâo iâu pơthưr hơdôm anih anom gum tơngan hrŏm kiăng kơ pơhlôm anăm brơi hlơi ôh dŏ glăi gah tlôn, kiăng abih bang mơnuih ƀơi kual giăm guai lêng kơ hơmâo tết soh. Anai lĕ pran khăp pap, tơlơi hơdor tơngia mơng anom bruă tơhan wai pơgang guai hăng mơnuih ƀôn sang kual giăm guai, sit biă ñu hăng neh met wa ƀun rin hơmâo tơlơi hơdip trơi pơđao, yâo mơ-ak, mơng anun gum tơngan hrŏm hăng mơnuih ƀôn sang đơ đam dêh čar hrŏm hăng ling tơhan wai pơgang guai hơđong kjăp amăng rơnuk phrâo”.

Trung tá Đỗ Như Kiên, Khua puih kơđông tơhan wai lăng amăng jang jar kmar Lệ Thanh brơi thâo: Rĭm thun lêng tui anun soh, truh bơyan tết ƀing adơi ayong ling tơhan amăng puih kơđông tơhan hrŏm hăng gong gai ƀon lan gum tơngan hrŏm prap lui tết kơ neh met wa amăng plơi pla hơmâo puih kơđong tơhan pơdong, sit biă ñu lĕ hơdôm boh sang anŏ tơnap tap, pơhlôm kiăng neh met wa ngă hiưm pă ăt dưi čơkă thun phrâo trơi pơđao, hơmâo djop mơta. Hrŏm hăng anun ăt ƀu wơr bruă jao wai pơgang hơđong kjăp ƀơi guai lŏn ia, tŏ tui hyu tir amăng hơdôm hrơi ƀong tết.

“Anom bruă kơtưn hơdôm bruă hyu tir, wai lăng ƀơi kual giăm guai kiăng pơhlôm brơi bruă wai lăng hơđong kjăp ƀơi guai lŏn ia, laih dong gum hrŏm hăng hơdôm anom bruă anun lĕ kông ang, tơhan ƀon lan kiăng kơ pơhlôm hơđong amăng hơdôm kual wai lăng, kual giăm guai hơmâo arăng jao wai lăng. Gơgrong kiăo tui lăng tơlơi sit nik amăng lăm, gah rơngiao kiăng hmao tlôn thâo, đăo lăng hlâo, sem lăng tơlơi sit nik kiăng hmao tlôn pơphô bruă brơi Ping gah anom bruă wai lăng puih kơđông kah hăng Ping gah anom bruă git gai tơhan wai pơgang guai tơring čar Gia Lai”.

Hơdôm bruă mă yôm phăn amăng bơyan bơnga thun 2025 ƀu djơ̆ kơnong ba glăi tơlơi hok mơ-ak, pơđao pran jua mơnuih djop djuai ania kual giăm guai tơring čar Gia Lai đôč ôh mơ̆ ăt pơgôp pơjing pran đăo gơnang amăng mơnuih ƀôn sang, ngă atur brơi kơ bruă wai pơgang guai lŏn ia. Mơng anun, jai pơsit tong ƀiă dong tơlơi gơgrong hăng tơlơi glăm ba mơng tơhan wai pơgang guai lŏn ia amăng bruă wai lăng hăng pơjing tơlơi hơdip hơđong ƀơi kual giăm guai./.