Sa bơyan bơnga phrâo dong trun rai-Thun phrâo Ất Tỵ truh laih, djă ba tơlơi hok mơ-ak, tơlơi čang rơmang hăng hơdôm tơlơi kiăng hiam klă hloh. Amăng hrơi mông yôm phiăn lơm thun sô rơgao thun phrâo đĭ rai, pơ ala khua mua Ping gah, Kơnuk kơna, kâo mơ-it nao abih bang mơnuih ƀôn sang, ƀing apăn bruă, ling tơhan đơ đam dêh čar hăng mơnuih ƀôn sang pơ tač rơngiao tơlơi pơpŭ thun phrâo hiam klă hloh. Kâo ăt mơ-it nao gơyut gơyâo, mơnuih ƀôn sang hơdôm boh dêh čar amăng rŏng lŏn tơnah tơlơi pơpŭ thun phrâo rơnuk rơnua, yâo mơ-ak, giang mah hăng pơđĭ kyar.

Amăng thun rơgao, ƀing ta hơmâo găn rơgao lu tơlơi glêh tơnap, samơ̆ anai ăt lĕ sa thun ba glăi lu tơlơi dưi prong prin. Amăng tơlơi tơnap tap, tơlơi lông, pran gum pơgôp, pran khăp pap, thâo djru tơdruă hăng pran hrưn đĭ mơng djuai ania ta jai pơƀuh tong ten. Ping gah, abih bang mơnuih ƀôn sang, khul ling tơhan hơmâo gir run dưi ngă hăng ngă rơgao 15/15 hơnong pơkă pơđĭ kyar bơwih ƀong huă-mơnuih mơnam, rơnoh pơđĭ kyar bơwih ƀong huă dong amăng hơdôm boh dêh čar ba jơlan hlâo amăng rŏng lŏn tơnah; tơlơi hơdip mơda kơ mơnuih ƀôn sang ƀu pơdơi pơplih hăng hrưn đĭ; kơđi čar-mơnuih mơnam hơđong, bruă wai pơgang rơnuk rơnua hơmâo pơhlôm, pơtom hiăp pok phư, hơmâo gơyut gơyâo amăng rŏng lŏn tơnah pơpŭ hăng lăng yôm. Rĭm čô mơnuih ƀôn sang Việt Nam, amăng lŏn ia hăng pơ tač rơngiao, mơng ƀing kông ñơn, mơnuih ngă hmua, ƀing bơwih ƀong sĭ mơdrô, ƀing thâo thăi truh pơ ling tơhan kual giăm guai, bul pơtâo ataih yaih lêng pơ-ư ang kơ hơdôm tơlơi gum pơgôp amăng tơlơi dưi hrŏm amăng lŏn ia ta.

Thun 2025, lĕ thun hơmâo lu bruă yôm phăn amăng lŏn ia, thun “hrưn đĭ, pơplih tañ”, ngă atur kiăng ba lŏn ia ta yak nao rơnuk pơplih phrâo-rơnuk hrưn đĭ mơng pô kiăng pơđĭ kyar, prong kơtang hăng pơdrong asah; tơlơi pơmĭn mơng Ping gah mut hrŏm hăng pran jua mơnuih ƀôn sang kơ hơnong pơkă pơdrong asah mơng djuai ania ta. Mah dŏ lu tơlơi tơnap tap, tơlơi lông, samơ̆ dêh čar Việt Nam amra yak nao pơ anăp, ƀu hơmâo hơget dưi pơgăn pran hrưn đĭ hăng kơñ pơgi hiam klă mơng djuai ania ta. Ping gah, abih bang mơnuih ƀôn sang, ling tơhan tŏ tui gum pơgôp ha pran sa jua, pơdah pran ngă pô, khin hơtai, gơgrong, pơ-ư ang djuai ania, tŏ tui tơlơi gal, găn rơgao djop tơlơi tơnap tap, tơlơi lông kiăng pơđĭ kyar kơtang, pơjing lŏn ia Việt Nam pơdrong asah, prong kơtang, ngă pô, bơkơnar, hiam klă; abih bang mơnuih ƀôn sang lêng kơ hơmâo tơlơi hơdip trơi pơđao, rơnuk rơnua, yâo mơ-ak; kiăng pơgôp jai hrơi lu tui kơ bruă pơgang rơnuk rơnua, hơđong, pơđĭ kyar amăng kual hăng rŏng lŏn tơnah.  

Amăng hrơi mông rŏng lŏn-rơngĭt adai tơkuh nao rai, pran jua mơnuih ol kơdol, hok mơ-ak čơkă thun phrâo, sa wŏt dong kâo pơpŭ hơ-ơč abih bang mơnuih ƀôn sang, ƀing apăn bruă, ling tơhan đơ đam dêh čar hăng mơnuih ƀôn sang pơ tač rơngiao thun phrâo hiam drơi jăn pran jua, yâo mơ-ak, pơdrong asah. Thun phrâo amra hơmâo lu tơlơi dưi phrâo.

Kơkuh bơni hiam klă!