Thun 2025, Dak Lak mrô jao iâu pơmut ngă tơhan lĕ 3.030 čô amăng mrô hơmâo 2.550 čô mut ngă tơhan blah ngă hăng 480 čô mut ngă tơhan kông an mơnuih ƀôn sang. Amăng tal iâu pơmut ngă tơhan blah ngă hăng tơhan kông an thun 2025 anai, tơdăm hlăk ai anăn Y Rani Ƀyă, djuai ania Êđê thun tơkeng 2005, dŏ ƀơi Ƀôn Čư̆ Phiăng, să Hòa Phong, tơring glông Krông Bông, tơring čar Dak Lak ñu čih hră rơkâo mut ngă tơhan. Tơdơi kơ ƀong têt mơak mơai lĕ Y Rani amra nao mut tơhan yơh, prăp lui gơnam tam, kơsăk kơđôgui ba gơnam yua či nao mut ngă tơhan:“Kâo hok mơak  biă mă dưi hơmâo khua mua gong gai plơi pla ngă gêh găl brơi kâo mut ngă tơhan, djơ̆ anăn mut ngă tơhan. Kâo  gir run prăp lui klă hloh kiăng nao ngă tơhan hăng mă bruă dŏ amăng ling tơhan klă hloh, ngă tui djơ̆ tơlơi pơtrun mơ̆ng khua mua pơtrun hăng jao bruă. Truh abih thun ngă tơhan glăi pơ plơi pla ăt djru amĭ ama sang anŏ hăng gum hrŏm bruă mă amăng plơi pla, ala ƀôn”.

Blan klâo guai dêh čar” jing jơlan hơdră tui tơđar rim thun mơ̆ng khul hlăk ai amăng tơring čar Gia Lai, či pơsit brơi bruă mă “Kâo khăp kơ Lŏn ia kâo”. Blan 3/2024, hlăk ai tơring glông Đức Cơ ngă hrŏm pơphun jơlan hơdră “Blan klâo guai dêh čar”, brơi sang dŏ hơdor tơngia, apui lơtrik hrip pơ-iă yang hrơi hăng brơi prăk hrăm hră kơ hlăk ai čơđai muai, laih dong khăm pơjrao, brơi ia jrao mơñum kơ mơnuih ƀôn sang. Tŏ tui, jơlan hơdră “Hlăk ai Gia Lai yua kơ guai dêh čar” ƀơi să Ia Pnôn tơring glông Đức Cơ kiăng pơđĭ tui tơlơi thâo hluh Tơlơi phiăn guai dêh čar hăng plai ƀiă dŏ rơkơi bơnai aka ƀu truh thun. Khul hlăk ai ăt gir ngă bruă djru plơi pla, kih rơmet lan sang rung, sang hră. Hlăk ai Siu H’Thanh lăi, bruă anai pơsit tơlơi gơgrong bruă mơ̆ng Hlăk ai djru bang hyu tơlơi gum pơgôp, gơgrong bruă amăng plơi pla:“Kâo jing hlăk ai hơmâo pran jua, bơ să ta anai jing să guai dêh čar, anun jing kâo khŏm gir djru plơi pla yơh, kiăng hơmâo boh than hiam hăng lu tơlơi mơak mơai. Ƀing khua lăng ba biă kơ ƀing ta, laih anun brơi gơnam kơ neh met wa čơkă ngui tê̆t, pơkă brơi tơlơi suaih pral kơ mơnuih ƀôn sang, brơi ia jrao đôč, hlơi ruă lĕ pơjrao brơi hlao. Tê̆t truh laih, gơñu lăng ba, djru ba să pơ guai lŏn ia hăng lu gơnam pơpŭ yôm biă mă hăng tơlơi tơnap tap ƀing ta pơ anai”.

Thun 2025 lĕ thun yom biă mă hăng bruă ngă pơgiong tơhnal pơkă pơđĭ kyar lŏn ia mơ̆ng čăl pơkă 2021-2025; anăp nao jơnum prong ruah khua ping gah djop gưl amăng dêh čar ta tal XIV laih anun lu bruă mă pơprong, yom amăng dêh čar. Tui hăng H’El, Kơ-iăng khua anom bruă tơdăm dra mut phung tơring glông Krông Knô, tơring čar Dak Nông, hơdôm bruă mă yom, pơprong anun kiăng ƀing hlăk ai, tơdăm dra khom thâo gum pơgôp hăng pran jua kơsung nao hlâo amăng bruă mă, djru hrŏm djop gưl anom bruă ping gah, gong gai kơnuk kơna ngă tui tŭ yua trih bruă mă jao bơwih ƀong huă, mơnuih mơnam, pơgôp hrŏm hăng lŏn ia kơjăp pran jua yak nao amăng bruă mă hrưn đĭ lơ̆m rơnuk phrâo, rơnuk djuai ania ta gir run hrưn đĭ mă pô:“Thun 2024 lĕ sa thun tŭ yua biă mă mơ̆ng lŏn ia ăt kah hăng tơring čar Dak Nông. Tơlơi git gai tơpă djơ̆ hơnơ̆ng mơ̆ng ping gah, kơnuk kơna ăt kah hăng djop gưl anom bruă ping gah tơring čar, plơi pla hơmâo djru pơtrut tơlơi bơwih ƀong huă, ngă hơđong tơlơi hơdip mơda ƀôn sang. Thun 2025, hơmâo lu bruă mă hơdor pioh, jơnum prong lŏn ia, jing ƀing hlăk ai, drơi jăn kâo pô hrŏm hăng ƀing gơyut tơdăm dra hlăk ai mut phung khom gir run hloh, gir run kiăng lăp hăng anăn jing hlăk ai prong pran hơtai kơsung nao hlâo djop bruă mă, bơwih ƀong huă, gru grua kơđi čar mơnuih mơnam”.